Kryeziu-Hyseni: PDK-ja nuk ka hapësirë të kushtëzojë zgjedhjen e presidentit me Gjykatën Speciale

Deputetja e Lëvizjes Vetëvendosje, Arbëreshë Kryeziu-Hyseni, ka hedhur kritika të ashpra ndaj Partisë Demokratike të Kosovës, për shkak të qëndrimit të kësaj të fundit për t'i kushtëzuar bisedimet rreth kreut të shtetit me avancimin e legjislacionit për Dhomat e Specializuara. Ajo ka vlerësuar se ky post mbetet jetik për ecurinë e ardhshme të shtetit. Duke sjellë në vëmendje se PDK-ja ka dhënë kontribut të drejtpërdrejtë në ngritjen e Gjykatës Speciale, ligjvënësja e Vetëvendosjes ka theksuar se kjo forcë politike nuk e gëzon luksin e vendosjes së kushteve të tilla. Ajo u bëri thirrje aktorëve politikë që të lënë anash agjendat individuale dhe të orientohen nga bashkëpunimi për këtë çështje kyçe. "Po besoj që kushtëzimet e tilla më së miri e shpërfaqin interesin e vërtetë të partive politike, sepse një parti politike si PDK, e cila ka kontribuar në krijimin e Gjykatës Speciale specifikisht, mendoj që nuk e ka aspak luksin të vërë kushtëzime të tilla dhe ky kushtëzim na tregon që nuk është që e kanë ndoshta me të vërtetë shumë të rëndësishme çështjen e ligjit, sepse nuk mund të kushtëzosh duke thënë votoje ligjin e po pastaj ndalemi edhe bisedojmë për çështjen e presidentit. Çështja e presidentit është shumë e rëndësishme, për shumë arsye, sidomos për mënyrën se si ka me ec tutje Kosova përpara. Kështu që duhet me i lënë anash këto interesat personale, fatkeqësisht po është e pamundur siç po shihet prej këtyre partive politike, edhe prej deklaratave të këtyre deputetëve të këtyre partive që po i kanë individuale, pra gjithçka po e lidhin politikisht, gjithçka po e lidhin me interesin e vet personal, edhe prandaj po kushtëzojnë. Edhe po mendoj që PDK më së paku e ka luksin me bë kushtëzime të tilla," u shpreh ajo. Në vijim, Kryeziu-Hyseni ka lëshuar një paralajmërim se mungesa e një konsensusi parlamentar deri më 6 tetor do t'i hapë rrugë detyrueshëm zgjedhjeve të reja të parakohshme në vend. "Çështja e presidentit është shumë e rëndësishme. Nëse ka interes për një marrëveshje prej partive politike, duhet të tejkalohet maksimumi deri më datën 6 tetor. Përndryshe vendi do të shkojë në zgjedhje, e do të shkojmë në zgjedhje pikërisht për shkak të mosvullnetit të këtyre partive politike me bashkëpunu që ne me e zgjedh presidentin në Kuvend," përfundoi ajo.