Kurti lëshon thirrjen urgjente: Kemi vetëm 6 ditë kohë për të arritur marrëveshje për presidentin

Kryeministri i Kosovës, Albin Kurti, ka kërkuar arritjen e një konsensusi të ri politik për zgjedhjen e kreut të shtetit, duke theksuar se vendi po përballet me një dinamikë urgjente pas vendimit të fundit nga Gjykata Kushtetuese. Kjo gjykatë ka përcaktuar qartë se afati prej 60 ditësh për zgjedhjen e presidentit do të përmbyllet më 6 tetor 2026. Gjatë mbledhjes së ekzekutivit, shefi i qeverisë vuri në dukje se dakordësia e mëparshme me LDK-në është cenuar, duke shtuar se gjashtë ligjvënës nga radhët e kësaj force politike nuk i kanë dhënë mbështetjen e tyre. “Aktgjykimi i Kushtetueses i cili prodhoi një normë të re lidhur me rrjedhjen e afatave për zgjedhjen e presidentit na vë përpara një situate urgjente për veprim. Ne kemi një marrëveshje me LDK-në, por e dimë që ajo u shkel dhe u braktis nga gjashtë deputetë të saj, përkundër që ajo e kishte bekimin e kryesisë së partisë së tyre”, u shpreh ai. Duke folur për kohën e mbetur, Kurti bëri thirrje që të shfrytëzohet secili moment për të gjetur një zgjidhje të përbashkët brenda gjashtë ditëve të ardhshme. “Para nesh po sot kemi edhe 6 ditë të plota për t’i dhënë vendit president ose presidente të re. Përveç arritjes së një marrëveshjeje të re dhe zgjedhjes së presidentit, përveç së arritjes së një marrëveshje të re dhe zgjedhja e presidentit është e mundshme, rrjedhimisht zgjedhjet e reja të panevojshme me pasoja të rënda gjithsesi se janë të shmangshme, andaj le të ulemi bashkë”, shtoi më tej ai. Kreu i qeverisë paralajmëroi gjithashtu se dështimi në këtë proces do ta zhytë vendin në një cikël zgjedhjesh të parakohshme, të cilat jo vetëm që nuk e zgjidhin çështjen e presidentit, por thellojnë edhe paqartësimet institucionale. “Zgjedhjet e reja, ndonëse do të shkaktoheshin si pasojë e dështimit për zgjedhjen e presidentit, sërish nuk do të ishin zgjedhje për president. Ato, përveçse pa Kuvend edhe një herë, këtë herë do të na linin edhe me paqartësi për ushtrimin e detyrës së presidentit. Ndërkaq qeveria do të mbetej në detyrë. Nuk kemi nevojë që të shkojmë pa numër herë në zgjedhje vetëm për të arritur në pikën e njëjtë. Vendit tonë më shumë se kurrë i duhet stabiliteti institucional”, përfundoi deklaratën e tij Kurti.