Sport
Dramë dhe barazim në derbin e hendbollit, Samadrexha mbyll stinorin me dominim absolut
Reklamë e Sponsorizuar
Derbi i xhiros së nëntë në Superligën e Kosovës në hendboll për femra nuk ka prodhuar një fitues, pasi sfida mes Shqiponjës dhe Istogut u mbyll me rezultatin e barabartë 29:29.
Në takimin e zhvilluar këtë të diel në Gjakovë, mysafirët nga Istogu e nisën më mirë ndeshjen, duke dominuar pjesën e parë ku krijuan dy herë epërsi prej pesë golash, për ta mbyllur këtë fraksion me avantazhin minimal 16:15.
Edhe në pjesën e dytë, Istogu arriti të shkëputej sërish në 19:16, por gjakovaret nuk u dorëzuan, duke reaguar shpejt për të ngushtuar rezultatin. Pavarësisht se Istogu mbajti avantazhin prej tri golash në momente të ndryshme (25:22, 26:23, 27:24), minutat e fundit shkaktuan tension të madh. Në minutën e 59-të, Istogu shënoi për 29:27, por Ana Carolini Gonçalves dhe Adelina Berisha shënuan golat vendimtarë në çastet e fundit për të vulosur barazimin 29:29.
Për Shqiponjën, Celina Tolno Sia dhe Alma Nivokazi ishin më të dalluarat me nga dhjetë gola secila. Ndërkaq, te Istogu shkëlqeu Mayseem Azri me 12 gola, e ndjekur nga Farida Mabrouk me shtatë dhe Elsa Shala me gjashtë realizime.
Pas këtij barazimi, Istogu dhe Shqiponja e përmbyllin stinorin vjeshtor me nga 11 pikë, duke mbajtur përkatësisht vendin e dytë dhe të tretë në tabelë.
Ndërkohë, kampioni në fuqi, Samadrexha, ka konfirmuar formën e lartë duke e mbyllur stinorin si lider i pakontestueshëm. Të dielën, ato triumfuan thellë 48:20 ndaj Besës së Pejës, duke regjistruar fitoren e shtatë radhazi. Arona Krasniqi ishte realizuesja kryesore për Samadrexhën me dhjetë gola, ndërsa te Besa, e cila renditet e pesta me gjashtë pikë, u dallua Edona Radoniqi me gjashtë gola.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: