Sport
Struga TL triumfon në Shtip me përmbysje, forcon udhëheqjen në elitën e futbollit maqedonas
Reklamë e Sponsorizuar
Struga Trim Lum ka arkëtuar tri pikë vendimtare në udhëtim ndaj Bregallnicës së Shtipit, duke fituar me shifrat 2:1, në takimin e vetëm të zhvilluar ditën e sotme në kuadër të kampionatit elitar të Maqedonisë së Veriut.
Formacioni nga Struga ka dëshmuar karakter duke përmbysur epërsinë e vendasve, sukses ky që i lejon të konsolidojnë kreun e tabelës.
Pjesa e parë foli më shumë për vendasit, të cilët gjetën rrugën e rrjetës në minutën e 42-të përmes Ivan Gligorov, i cili shënoi një gol estetik për t'i dhënë avantazhin 1:0 Bregallnicës.
Gjithsesi, reagimi i skuadrës strugane ishte i menjëhershëm në fraksionin e dytë të lojës. Në minutën e 51-të, Altin Aliji barazoi shifrat në 1:1 me një ekzekutim magjik direkt nga goditja e këndit.
Kur sfidës po i theheshin minutat e fundit dhe gjithçka po shkonte drejt një ndarjeje pa fitues, në skenë u shfaq sulmuesi Marjan Radeski. Në minutën e 87-të, pas një aksioni të rrjedhshëm, ai realizoi me kokë për të përmbysur plotësisht rezultatin në 1:2 dhe për t'i dhuruar skuadrës së tij një fitore mjaft të rëndësishme.
Pas 14 xhirove të zhvilluara, Struga TL kryeson bindshëm renditjen e përgjithshme me 32 pikë të tubuara.
Në krahun tjetër, Bregallnica e Shtipit mbetet e pozicionuar në vendin e shtatë të tabelës, duke numëruar 14 pikë në llogarinë e saj.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: