Aktuale
Trashëgimia e Xhafer Devës dhe dështimi historik për të dënuar krimet e komunizmit
Reklamë e Sponsorizuar
“Xhafer Deva nuk blihet me para, se është i pasur. Deva është armiku ynë i përbetuar. Deva duhet vrarë”. Kjo ishte gjuha që përdornin çetnikët dhe komunistët serbo-slavë, të cilët kishin gjetur aleatë të ngushtë në radhët e komunistëve shqiptarë.
Kush janë ata që ende sot shqetësohen nga figura e nacionalistit të shquar Xhafer Deva? Për dekada me radhë, mbetet për t'u habitur se si gjenocidi dhe krimet e komunizmit mbetën pa u ndëshkuar.
Gjatë periudhës kur Jugosllavia u pushtua nga Gjermania, Kosova po përjetonte një fazë tejet kritike, e privuar nga liria dhe të drejtat elementare njerëzore e kombëtare. Popullsia shqiptare po ballafaqohej me barbarinë, gjenocidin dhe spastrimin etnik serbo-slav, të cilat rrezikonin drejtpërdrejt vetë qenien e saj.
Për shqiptarët e Kosovës, prania e forcave gjermane u pa si një dritë shprese për t'i dhënë fund robërisë dhe për të realizuar aspiratën e bashkimit me Shqipërinë.
Ndërkohë që popullata e Kosovës ishte e vetëdijshme se si çetnikët ashtu edhe komunistët serbë ishin njësoj armiqësorë ndaj shqiptarëve, një qartësi e tillë mungonte në Tiranë. Komunistët në Shqipëri i besuan verbërisht Partisë Komuniste të Jugosllavisë dhe parullave të saj për “bashkim-vëllazërim”, proletariat dhe luftë antifashiste.
Në realitet, fijet e Partisë Komuniste Shqiptare dhe të lëvizjes partizane mbaheshin fort nga Miladin Popoviqi dhe Dushan Mugosha. Për t'u fshohur nga ndjeshmëria e shqiptarëve kundër serbëve, në plan të parë u nxorën figura si Enver Hoxha dhe Mehmet Shehu. Rreziku që i kanosej Kosovës dhe vetë Shqipërisë ishte ai i pansllavizmit të maskuar pas ideologjisë komuniste.
Kështu, nacionalistët kosovarë u gjendën përballë një fronti të gjerë armiqësor: çetnikëve, komunistëve serbë, malazezë e maqedonas, por fatkeqësisht edhe partizanëve dhe komunistëve shqiptarë, të cilët u përdorën nga strategjia serbe si instrumente kundër vetë interesave të Kosovës.
Me përfundimin e Luftës së Dytë Botërore dhe depërtimin e ushtrisë sovjetike në Jugosllavi, Kosova u vu nën pushtimin e brigadave partizane jugosllave dhe shqiptare, të cilat kryen masakra të rënda ndaj popullsisë vendase.
Në harkun kohor nga viti 1941 deri më 1944, forcat nacionaliste në Kosovë u angazhuan fuqimisht në mbrojtjen e kufijve dhe në ngritjen e strukturave shtetërore, përpjekje të cilat u shkatërruan nga vendosja e regjimit komunist.
Ky pushtim i dhunshëm serbo-slav në Kosovë mori fund vetëm më 12 qershor 1999, kur ndërhyrja e NATO-s e udhëhequr nga SHBA-ja mbështeti luftën çlirimtare të UÇK-së. Ngjashëm, në fund të vitit 1990, në Shqipëri u shemb diktatura komuniste.
Këto zhvillime ishin pikërisht ato për të cilat luftoi Xhafer Deva, i njohur si një patriot i madh dhe kundërshtar i flaktë i serbo-slavizmit dhe komunizmit.
Kjo është e vërteta historike që herët a vonë duhet të pranohet nga qarqet nostalgjike të komunizmit dhe nga segmente të caktuara mediatike e intelektuale. Brezat e ardhshëm duhet të edukohen me fakte dhe jo me manipulimet e trashëguara nga sistemi enverist.
Për të kuptuar natyrën e vërtetë të regjimit komunist, dëshmia më e besueshme vjen nga nacionalistët dhe trashëgimtarët e tyre, të cilët vuajtën drejtpërdrejt pasojat e atij sistemi të egër.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: