Alarm në fshatin Besi pas një tjetër përplasjeje në rrugë: Banorët kërkojnë ndërhyrje urgjente nga autoritetet

Një tjetër aksident trafiku është shënuar së fundmi në fshatin Besi të kryeqytetit, duke ringritur shqetësimet e thella të komunitetit lokal për sigurinë rrugore. Bazuar në pamjet e publikuara nga vendngjarja, në këtë incident janë përfshirë dy automjete, ndërkohë që deri në këto momente nuk ka ende zyrtarisht të dhëna për persona të lënduar. Reagimet e banorëvë nuk kanë munguar përmes faqes zyrtare të fshatit në rrjetet sociale, ku theksohet se ky nuk përbën një rast të izoluar, por një situatë alarmante që përsëritet vazhdimisht në këtë zonë të magjistrales Prishtinë-Podujevë. Kujtojmë se banorët e këtij lokaliteti kanë zhvilluar edhe më parë protesta duke kërkuar ngritjen e një rrethrrotullimi, një kërkesë kjo e mbështetur në faktin se përgjatë këtij segmenti rrugor operojnë dy shkolla, një kopsht fëmijësh, Qendra e Mjekësisë Familjare (QMF) dhe institucione të tjera komunale. “Deri kur do të presim që të ndodhë diçka më e rëndë që ky problem të merret seriozisht? Kjo nuk është më çështje komoditeti, por sigurie për banorët, fëmijët dhe të gjithë pjesëmarrësit në trafik”, thuhet në reagimin e tyre. Në mesazhin e përbashkët të banorëve gjithashtu shtohet: “Në këtë pjesë ndodhen afër kopshti, QMF-ja dhe shërbime të tjera, prandaj kërkojmë një zgjidhje konkrete dhe të qëndrueshme, jo vetëm reagim pasi të ndodhë aksidenti”. “Sa aksidente të tjera duhet të ndodhin që të merret një masë?”, përfundon thirrja e drejtuar institucioneve përgjegjëse nga banorët e Besisë.