Krime lufte në Kaçanik: Prokuroria Speciale dorëzon aktakuzën ndaj ish-policit serb

Prokuroria Speciale e Republikës së Kosovës ka depozituar në Gjykatën Themelore në Prishtinë një aktakuzë zyrtare kundër të pandehurit A.D., i cili ngarkohet me dy vepra penale: “Krime lufte kundër popullsisë civile” dhe “Mbajtja në pronësi, kontroll ose posedim të paautorizuar të armëve”. Sipas dokumentit të akuzës, ngjarjet datojnë më 9 mars 1999 në fshatin Ivajë dhe vendbanimet përreth të Komunës së Kaçanikut. Në atë kohë, i pandehuri A.D., duke shërbyer si zyrtar policor në Stacionin e Kaçanikut, dyshohet se në bashkëveprim me persona të tjerë ende të panjohur nga radhët e forcave policore dhe ushtarake serbe, ka ndërmarrë akte dhune që përfshijnë torturën, trajtimin çnjerëzor, frikësimin masiv, shkatërrimin e pronave dhe dëbimin me dhunë të civilëve shqiptarë. Në dosjen e prokurorisë thuhet se operacioni kishte nisur me rrethimin e plotë të fshatit Ivajë, pas së cilës banorët u detyruan të braktisnin vatrat e tyre, të cilat më pas u dogjën dhe u rrafshuan përtokë. Gjatë këtij operacioni, burrat u ndanë dhunshëm nga gratë dhe u transportuan në Stacionin Policor të Kaçanikut. Nga ky grup, 78 veta u lanë të lirë më vonë, ndërsa 13 të tjerë u mbajtën të mbyllur për t'u marrë në pyetje, periudhë gjatë së cilës ata dyshohet se janë nënshtruar ndaj rrahjeve dhe torturave çnjerëzore nga i pandehuri A.D. dhe bashkëpunëtorët e tij. Tashmë, lënda i ka rënë për rishqyrtim Gjykatës Themelore në Prishtinë, e cila do të vijojë me procedurat e mëtejshme ligjore.