Kronikë
EULEX hedh poshtë akuzat: Asnjë armë nuk iu drejtua familjarit të Jakup Krasniqit
Reklamë e Sponsorizuar
Misioni i Bashkimit Evropian për Sundimin e Ligjit në Kosovë (EULEX) ka reaguar zyrtarisht lidhur me pretendimet se një pjesëtar i tyre ka drejtuar armën ndaj një familjari të Jakup Krasniqit, gjatë kohës kur ky i fundit ishte urdhëruar të hynte brenda shtëpisë.
Nëpërmjet një deklarate për media, EULEX i ka hedhur poshtë këto raportime, duke i cilësuar ato si pretendime tërësisht të pabazuara. Sipas misionit, zyrtarët e tyre ishin angazhuar në ofrimin e mbështetjes logjistike dhe operacionale për Dhomat e Specializuara të Kosovës, në kuadër të një vizite me karakter humanitar të një të paraburgosuri, dhe në asnjë moment nuk ka pasur përdorim apo drejtim të armëve ndaj personave të pranishëm.
“EULEX-i mohon kategorikisht këto pretendime dhe nënvizon se zyrtarët policorë të misionit, në asnjë rrethanë, nuk kanë drejtuar armë ndaj askujt”, thuhet në reagimin e misionit evropian. Po ashtu, është theksuar se personeli i tyre operon duke respektuar në përpikëri standardet ndërkombëtare dhe evropiane për trajtimin e armëve të zjarrit.
Ndërkaq, gjatë zhvillimeve në vendin e ngjarjes, është raportuar gjithashtu se zyrtarët e këtij misioni kanë tentuar të kufizojnë punën e ekipeve mediatike, duke penguar xhirimet e tyre jashtë shtëpisë së Jakup Krasniqit.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: