Sport
Kosova kërkon përkrahjen e Budapestit zyrtar për rrugëtimin drejt Bashkimit Evropian
Reklamë e Sponsorizuar
Nënkryetari i Kuvendit të Kosovës, Ardian Gola, ka zhvilluar një takim zyrtar me ambasadorin e Hungarisë në Kosovë, László István Dux, të shoqëruar nga sekretari i dytë i ambasadës, Olivér Kovács. Fokus kryesor i këtij takimi ishte forcimi i bashkëpunimit dypalësh dhe kërkesa e shtetit kosovar për mbështetje aktive nga Hungaria në agjendën euroatlantike, duke përfshirë këtu marrjen e statusit të vendit kandidat për anëtarësim në BE dhe avancimin e procesit të anëtarësimit në Këshillin e Evropës.
Gjatë bashkëbisedimit, palët shkëmbyen pikëpamje mbi zhvillimet e fundit politike në të dyja vendet, si dhe analizuan dinamikat rajonale dhe ato ndërkombëtare. Gola e shfrytëzoi këtë rast për të vlerësuar lart kontributin e vazhdueshëm të Hungarisë në proceset e shtetndërtimit dhe konsolidimit të paqes në Kosovë.
“Që nga njohja e pavarësisë së shtetit tonë e deri te angazhimi i rëndësishëm brenda misionit të KFOR-it, Hungaria ka luajtur një rol kyç në ruajtjen e sigurisë, stabilitetit dhe në forcimin e institucioneve demokratike të Kosovës”, deklaroi ndër të tjera nënkryetari i Kuvendit.
Në këtë takim u vlerësua gjithashtu partneriteti në fushën e arsimit, me theks të veçantë te programi i bursave “Stipendium Hungaricum”, i cili u ofron studentëve kosovarë mundësinë për të ndjekur studime universitare në Hungari.
Në mbyllje të takimit, Gola rikonfirmoi përkushtimin e Kosovës ndaj vlerave euroatlantike, duke nënvizuar se sundimi i ligjit, mbrojtja e të drejtave të njeriut dhe avancimi i demokracisë mbeten shtyllat kryesore mbi të cilat po ndërtohet e ardhmja e shtetit të Kosovës.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: