Sport
Rifillon futbolli elitar në Maqedoni: Shkëndija e Haraçinës kërkon triumfin e radhës ndaj Bashkimit
Reklamë e Sponsorizuar
Pas një pauze dyjavore për shkak të angazhimeve të kombëtareve, sot rikthehen emocionet dhe sfidat në elitën e futbollit të Maqedonisë.
Sot, duke filluar nga ora 13:00, do të luhet ndeshja hapëse e xhiros së 14-të, ku do të përballen Shkëndija e Haraçinës dhe Bashkimi i Kumanovës. Kjo sfidë do të zhvillohet në stadiumin e Çairit në Shkup.
Në letër, skuadra vendase konsiderohet favorite, duke u nisur si nga pozita në renditjen tabelore, ashtu edhe nga përbërja cilësore e grupit.
Shkëndija e Haraçinës synon të vazhdojë serinë e sukseseve pas fitores së arritur në xhiron e kaluar, dy javë më parë, kur triumfoi si mysafire ndaj Arsimit.
Para këtij takimi, ekipi nga Haraçina pozicionet në vendin e pestë me 18 pikë të grumbulluara, ndërsa kumanovarët ndodhen në vendin e tetë me 11 pikë në llogarinë e tyre.
Megjithatë, pikët janë jetike për Bashkimin e Kumanovës. Skuadra mysafire pritet të japë maksimumin në fushë, pasi posedon ambiciet e veta, ndërkohë që kujdes i madh i duhet kushtuar formacionit që drejtohet nga Muarem Muaremi.
Në fushën e gjelbër pritet një betejë e fortë dhe një ndeshje tejet e luftuar. Sfida paralajmërohet e vështirë, sidomos për shkak të gjendjes jo të mirë të terrenit në stadiumin e Çairit, por spektakli dhe emocionet nuk do të mungojnë.
Në kuadër të xhiros së 14-të do të zhvillohen edhe ndeshjet e tjera:
Vardari – Tikveshi (13:00)
Bregallnica – Struga Trim Lum (12:00), në Shtip.
Shkëndija e Tetovës – Sileksi (13:00), në Arenën e Shkupit.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: