Gvardiol pas debaklit ndaj Spanjës: E tepruam me respektin ndaj kundërshtarit

Kombëtarja e Kroacisë ka pësuar një disfatë të thellë me rezultat 4:1 përballë Spanjës, në kuadër të ndeshjes së dytë të Grupit A3 në Ligën e Kombeve. Ky rezultat ka lënë shije të hidhur te kampi kroat, ndërsa mbrojtësi Joshko Gvardiol ka analizuar shkaqet e kësaj paraqitjeje zhgënjyese. Në deklaratën e tij pas takimit, Gvardiol pranoi se skuadra e tij hyri në fushë me një dozë të tepruar respekti ndaj spanjollëve. “Ishte një mbrëmje tejet e vështirë dhe një humbje që dhemb. Duhet t’i urojmë kundërshtarët për lojën. E dinim përpara se çfarë na priste, por nuk është kurrë e thjeshtë të përballesh si mysafir me një ekip të këtij kalibri,” deklaroi ai. Sipas mbrojtësit, rrjedha e ndeshjes u diktua që në fillim, pasi pësimi i golit pas vetëm 30 sekondash loje tronditi ekipin. “Pasi pranuam golin e hershëm, u përpoqëm të rimarrim veten dhe të kthehemi në lojë, por në fund rezultati ishte mjaft i rëndë,” shtoi Gvardiol. Duke komentuar zhvillimet e ndeshjes, Gvardiol shprehu kënaqësinë për golin e shënuar nga Dion Drena Beljo, ndërsa nuk kurseu vlerësimet për talentin spanjoll, Lamine Yamal. Ai theksoi se Yamal është një kërcënim konstant që kërkon vëmendje të shtuar. “Më vjen mirë për golin e Beljos. Sa i përket Yamalit, ne e dimë mirë se çfarë lojtari është. Ai di ta shfrytëzojë çdo hapësirë të lirë që i lihet. Nëse i jep kohë dhe hapësirë, ai do të dijë si të ndëshkojë,” përfundoi mbrojtësi kroat.