Hamza vendos kushtin për presidentin: S’ka negociata pa u miratuar ligji për Gjykatën Speciale

Kryetari i Partisë Demokratike të Kosovës (PDK), Bedri Hamza, ka shpalosur qëndrimin e prerë të partisë së tij lidhur me procesin e zgjedhjes së presidentit, duke e kushtëzuar këtë proces me miratimin e ndryshimeve ligjore për Gjykatën Speciale. Në një intervistë për emisionin “Pressing”, Hamza ka nënvizuar se për PDK-në prioritet absolut mbetet çështja e ligjit, e cila duhet të marrë epilog përpara çdo diskutimi tjetër politik. Sipas tij, përpjekjet e mëparshme për të gjetur një gjuhë të përbashkët për postin e presidentit kanë dështuar, prandaj PDK-ja do të vazhdojë të veprojë si subjekt opozitar. “Ligji është përparësia jonë kryesore. Kemi tentuar të bisedojmë për çështjen e presidentit, por kemi konstatuar mungesën e një rruge për marrëveshje, ndaj kemi vendosur të mbetemi në opozitë”, deklaroi Hamza. I pari i PDK-së ka qenë mjaft specifik sa i përket renditjes së këtyre proceseve, duke kërkuar që votimi i ligjit të ndodhë sa më parë. Ai ka bërë të ditur se, sapo ky ligj të kalojë në dy lexime në Kuvend, partia e tij është e gatshme të ulet në tryezën e bisedimeve. “E them fare qartë: ligji vjen i pari. Në momentin që ky ligj kalon në dy lexime, ne jemi të gatshëm të ulemi dhe të diskutojmë për kandidatin për president. Në një skenar të tillë, unë garantoj se PDK-ja do të ofrojë 22 votat e saj për emrin mbi të cilin do të dakordohemi”, ka përfunduar Hamza.