Sport
Antonio Cassano e cilëson rikthimin e Ronaldinhos si cirk: Ishte e dhimbshme ta shikoje në fushë
Reklamë e Sponsorizuar
Ish-sulmuesi i njohur italian, Antonio Cassano, ka dhënë një deklaratë të ashpër lidhur me rikthimin surprizë të Ronaldinhos në fushat e blerta. Legjendat e futbollit brazilian, në moshën 46-vjeçare, iu bashkua skuadrës italiane të Ravennas në Serie C, nëntë vite pasi kishte varur këpucët në gozhdë.
Ngjarja ndodhi të dielën e kaluar, kur mesfushori i shquar u rreshtua nga minuta e parë në triumfin 2:0 kundër Forlì-t. Ky hap i tij ngjalli kureshtje të madhe dhe habiti opinionin sportiv në Itali, aq më tepër duke ditur se ai është njëkohësisht edhe bashkëpronar i klubit nga Ravenna.
Prania e brazilianit bëri që stadiumi Bruno Benelli të mbushej plot e përplot, me tifozët që e pritën me duartrokitje të zjarrta. Duke mbajtur veshur fanellën ikonike me numrin 10, në ndeshjen e tij të parë zyrtare që nga koha te Fluminense në vitin 2015, Ronaldinho pati menjëherë ndikim duke u përfshirë në aksionin e golit të parë të shënuar nga Giulio Donati në minutën e 36-të. Ai e kreu detyrën përgjatë fraksionit të parë të lojës, për t'u zëvendësuar gjatë pushimit të ndeshjes.
Lidhja e tij me klubin e Ravennas daton që nga qershori i vitit 2026, kohë kur ai firmosi falë miqësisë së ngushtë që gëzon me presidentin e kësaj skuadre, Ignazio Cipriani. Megjithatë, kjo paraqitje e shkurtër nuk ka lënë shije të mirë te ish-lojtari i klubeve të mëdha si Roma, Milani, Interi dhe Real Madridi.
I ftuar në emisionin sportiv italian Viva El Futbol, Cassano nuk i fshiu aspak kritikat e tij.
"Fillimisht dua të sqaroj diçka: kam respekt të jashtëzakonshëm për Ronaldinhon, si njeri dhe si futbollist. Për mua, ai vazhdon të jetë ndër pesë lojtarët më të mëdhenj në historinë e futbollit, së bashku me Messin, Maradonën, Ronaldon Nazário dhe ndoshta Pelén", u shpreh ai.
"Por ajo që bëri ditën tjetër ishte vërtet e dhimbshme për t'u parë. Çfarë kërkon ai në fushë në moshën 46-vjeçare dhe në atë gjendje fizike? Nuk e kuptoj. A e bëri këtë për shkak të marrëdhënies me Ciprianin, i cili është miku i tij? Apo sepse i kanë paguar një shumë të madhe parash? Nuk e di. Për mua ishte një cirk qesharak. Nuk di si ta quaj ndryshe", shtoi mes tjerash ish-sulmuesi.
Pavarësisht se tifozët patën rastin të shijonin sërish magjinë e tij në fushë, Cassano theksoi se paratë nuk do ta bindnin kurrë atë për një veprim të tillë.
"Unë nuk do ta bëja këtë as nëse do të më ofronin 10 milionë euro. Madje as 20 milionë. Gjithë respektin për këtë njeri, i cili ka qenë gjithmonë modest dhe është një nga më të mëdhenjtë e të gjitha kohërave. Por, nëse më kërkoni ta vlerësoj pikërisht këtë ngjarje, për mua ishte një cirk dhe një farsë", përfundoi fjalën e tij Cassano.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: