Goditje për “Dardanët”, Albian Hajdari thyen heshtjen pas lëndimit: Më dhemb shpirti që s’mund t'ju ndihmoj

Mbrojtësi i Kombëtares së Kosovës, Albian Hajdari, ka ndarë me ndjekësit e tij një mesazh tejet emocional, pasi u detyrua të braktisë grumbullimin e “Dardanëve” shkaku i një dëmtimi, teksa tashmë është nisur drejt Gjermanisë për t'i nisur seancat e rikuperimit. Futbollisti i njohur që luan në Bundesligë te skuadra e Hoffenheimit, ka shfaqur keqardhjen e tij të thellë që nuk do të mund të kontribuojë për ekipin kombëtar në sfidat e radhës, duke pranuar se mungesa në një periudhë kaq vendimtare i dhemb më shumë sesa vetë dëmtimi trupor. Përmes një postimi në rrjetet sociale, Hajdari është rrëfyer hapur para opinionit publik dhe tifozëve, duke shprehur trishtimin e tij të thellë për këtë situatë të papritur. “Sot më dhemb jo vetëm lëndimi, por edhe mendimi se nuk do të jem në fushë me Kosovën në ndeshjet e ardhshme. Për fat të keq, duhet të kthehem në Gjermani për t’u rikuperuar. Lëndimi fizik është një dhimbje më vete, por të mungosh kur e di se ekipi po lufton për Kosovën… kjo dhemb edhe më shumë”, ka shkruar ndër të tjera ai. Futbollisti shtatlartë ka shtuar se dëshira e tij më e madhe ishte të ndante fushën me bashkëlojtarët, duke dhënë maksimumin për çdo top dhe për ngjyrat e fanellës dardane, të cilën e vlerëson si diçka të shenjtë. “Do të doja të isha aty, bashkë me ju, duke luftuar për çdo top, për çdo minutë dhe për këtë fanellë që për mua do të thotë gjithçka”, ka vazhduar më tej ai. Pavarësisht zhgënjimit që do t'i shohë ndeshjet nga distanca, mbrojtësi nuk ka lënë pa përmendur krenarinë e tij për grupin dhe përparimin e deritanishëm të përfaqësueses. “Kemi treguar karakter, kemi luftuar së bashku dhe kemi bërë që Kosova të jetë aty ku meriton të jetë”, ka deklaruar Hajdari, duke konfirmuar mbështetjen e tij të pakushtëzuar nga Gjermania. Në mbyllje të mesazhit të tij prekës, ai ka përcjellë një urim dedikuar fansave dhe skuadrës, duke lënë të kuptohet se rikthimi i tij do të jetë më i fuqishëm. “Unë do të jem me ju nga larg. Shihemi së shpejti”, ka përfunduar Albian Hajdari. Kjo mungesë e re paraqet një sfidë shtesë për planet e stafit teknik të Kosovës në vazhdimin e ndeshjeve të Ligës së Kombeve, ndërkohë që qendërmbrojtësi do të fokusohet plotësisht te faza e rehabilitimit në Gjermani. Kujtojmë se pas dy ndeshjeve të para, Kosova regjistron një fitore dhe një humbje, duke u pozicionuar në vendin e dytë të grupit, ndërsa sfida e radhës e pret kundër Izraelit, e cila do të zhvillohet të enjten në mbrëmje me fillim nga ora 20:45.