Formuli i suksesit të Barcelonës: Ancelotti gati të transformojë rolin e Raphinha te Brazili

Ndërsa në fanellën e Barcelonës ai shkëlqen si një prej elementëve më kyçë dhe vendimtarë, e kundërta ndodh shpesh kur bëhet fjalë për Përfaqësuesen e Brazilit. Raphinha ka konfirmuar vazhdimisht statusin e një lideri te katalanasit, ndërkohë që në arenën ndërkombëtare me Seleçaon nuk ka arritur të shfaqë gjithmonë potencialin e tij të plotë, duke mbetur shpesh në hije. Për t'i dhënë fund këtij kontrasti, trajneri Carlo Ancelotti po përgatitet të ndryshojë qasjen taktike, duke u bazuar te skema e suksesshme që po aplikohet në Katalonjë. Strategu italian synon të nxjerrë në pah aftësitë maksimale të sulmuesit anësor, duke e transferuar atë në një pozicion më qendror në repartin ofensiv. Sipas raportimeve të mediave braziliane, ky vendim i Ancelottit vjen si një frymëzim direkt nga puna e shkëlqyer që Hansi Flick ka bërë me 29-vjeçarin gjatë këtij edicioni futbollistik. Nën drejtimin e teknikut gjerman në stadiumin “Camp Nou”, Raphinha është shndërruar në një sulmues qendror tejet të rrezikshëm dhe efikas. Tashmë, ky model shihet nga Ancelotti si formula ideale për të zgjidhur ngërçin dhe problemet e fundit të Brazilit në fazën e finalizimit.