Bavarezët nisin ofensivën: Synimi i radhës është kontrata afatgjatë për yllin e skuadrës

Klubi i njohur gjerman, Bayern, po bën përgatitjet e duhura për të mbajtur gjatë në radhët e veta një tjetër prej shtyllave kryesore të ekipit. Pas arritjes së marrëveshjeve për vazhdimin e bashkëpunimit me Jamal Musiala dhe Harry Kane, drejtuesit e gjigantit bavarez janë gati për një tjetër sfidë të rëndësishme. Bëhet fjalë për hapjen e bisedimeve për rinovimin e kontratës me Michael Olise. Sulmuesi 24-vjeçar është shndërruar në një nga elementët më të rëndësishëm të formacionit, megjithatë trajtimi i tij financiar mbetet dukshëm më i ulët në krahasim me lojtarët më të paguar të klubit, si Kane dhe Musiala, të cilët arkëtojnë rreth 25 milionë euro në vit. Aktualisht, Olise fiton 14 milionë euro në sezon. Për të shmangur çdo surprizë, drejtuesit e Bayernit synojnë t'i paraqesin një propozim të ri, i cili do të shtrinte bashkëpunimin deri në vitin 2032 dhe do t'i garantonte atij një pagë vjetore prej 25 milionë eurosh. Krerët e klubit nga Mynihu kanë planifikuar që takimet vendimtare me lojtarin dhe përfaqësuesin e tij ligjor, Glen Tweneboah, të zhvillohen gjatë muajve të parë të vitit të ardhshëm.