Anulohet udhëtimi i maturantëve të Mjekësisë në Mitrovicë, Drejtoria e Arsimit sqaron arsyet

Planet e maturantëve të Shkollës së Mesme të Mjekësisë “Xheladin Deda” në Mitrovicë të Jugut për të realizuar ekskursionin janë ndërprerë për shkak të disa shkeljeve procedurale gjatë përzgjedhjes së agjencive. Drejtoria Komunale e Arsimit (DKA) ka marrë vendim që të anulojë këtë proces, pasi komisioni përgjegjës nuk i është përmbajtur në tërësi rregullave të përcaktuara zyrtarisht. Shefki Begu, drejtor i DKA-së në Mitrovicë të Jugut, ka bërë të ditur se ky vendim kufizohet vetëm te maturantët e kësaj shkolle. Sipas tij, Komisioni për pranimin e ofertave nga agjencitë e udhëtimit ka dështuar të veprojë në përputhje me dispozitat e Udhëzimit Administrativ nr. 02/2016 të MASHT-it, i cili rregullon Aktivitetet Jashtëshkollore. Një tjetër faktor përcaktues në këtë vendimmarrje ka qenë edhe mospërzgjedhja e ofertës më ekonomike për nxënësit. “DKA ka vendosur që ta anulojë ekskursionin për Shkollën e Mesme të Mjekësisë ‘Xheladin Deda’, pasi Komisioni për pranimin e ofertave nga agjencitë e udhëtimit nuk e ka zbatuar në përpikëri Udhëzimin Administrativ nr. 02/2016 për Aktivitetet Jashtëshkollore. Në fund, vlen të theksohet se nuk është përzgjedhur oferta më e lirë”, ka deklaruar Begu. I pyetur nëse tri shkollat e tjera të mesme do ta mbajnë ekskursionin e tyre, kreu i DKA-së ka sqaruar se edhe maturantët e Mjekësisë do të kenë mundësi ta realizojnë udhëtimin, por në një termin tjetër dhe pasi të sigurohet zbatimi i plotë i kritereve ligjore. “Po, edhe Mjekësia mundet, por në një datë tjetër. Duhet të respektohen kriteret dhe të përzgjidhet oferta më e lirë”, ka shtuar ai. Në krahun tjetër, drejtoresha e Shkollës së Mesme të Mjekësisë “Xheladin Deda”, Drita Zaraj Qamili, ka njoftuar se institucioni që ajo drejton nuk është informuar paraprakisht për këtë vendim dhe se tashmë janë në kërkim të sqarimeve zyrtare mbi arsyet e këtij hapi. “Vendimin na ka dërguar drejtori, më tepër nuk kemi as ne mundësi me dhënë përgjigje. Edhe ne jemi duke e kërkuar arsyen pse. E ka dërguar diçka për rregullsi ligjore, nuk e di saktësisht cila. Nuk është faj i shkollës sonë”, është shprehur ajo. Zaraj Qamili ka nënvizuar se i gjithë procesi organizativ është zhvilluar në bashkëpunim të ngushtë ndërmjet shkollës, Këshillit të Prindërve dhe Këshillit të Mësimdhënësve. “Parregullsitë ligjore nuk janë nga ana jonë. Kemi qenë prezente me shkollën, drejtorin, me Këshillin e Prindërve dhe Këshillin e Mësimdhënësve, kështu që vendimi është i DKA-së dhe besoj që ata i japin edhe arsyet pse”, ka shtuar tutje drejtoresha. Në fund, ajo ka pranuar se ky lajm nuk është pritur aspak mirë nga komuniteti i nxënësve dhe i prindërve të shkollës. “Është lajm i keqpritur nga ana e nxënësve dhe e prindërve, kështu që ne duhet të pajtohemi me vendimin që vjen nga DKA-ja”, ka përfunduar Zaraj Qamili.