Real Madridi synon një tjetër goditje te Liverpooli, në shënjestër kapiteni holandez

E ardhmja e Virgil van Dijk te Liverpooli mbetet në pikëpyetje të madhe, pasi qendërmbrojtësi ka hyrë në 12-muajshin e fundit të marrëveshjes së tij aktuale, ndërkohë që palët ende nuk kanë nisur bisedimet zyrtare për vazhdimin e bashkëpunimit. Sipas mediave ndërkombëtare, klubi nga Anfield nuk i ka paraqitur ende asnjë propozim konkret për rinovim 35-vjeçarit, duke hapur kështu rrugën e dyshimeve se ai rrezikon të largohet si lojtar i lirë në fund të sezonit. Pavarësisht moshës së tij, Van Dijk vazhdon të ruajë statusin e një prej mbrojtësve më elitarë në futbollin botëror, gjë që ka tërhequr vëmendjen e klubeve më të mëdha evropiane, ku në krye të listës së të interesuarve pozicionohet Real Madridi. Gjigantët spanjollë synojnë të përsërisin skenarin e suksesshëm të merkatos së kaluar, duke siguruar shërbimet e një tjetër ylli të Liverpoolit pa derdhur asnjë dëmshpërblim në arkat e anglezëve, ashtu siç ndodhi më parë me Ibrahima Konate. Megjithatë, gara për shërbimet e tij pritet të jetë e fortë, pasi burimet pranë lojtarit sugjerojnë se dëshira e fshehtë e holandezit mund të jetë një kalim i bujshëm te rivalët e përjetshëm të madrilenëve, Barcelona. Në çfarëdo skenari që të jetë, nëse mbrojtësi vendos të mbyllë aventurën e tij angleze në qershor, ai pa dyshim do të shndërrohet në një nga emrat më të lakuar dhe më të kërkuar në tregun e ardhshëm të transferimeve.