Fjalimi i Berishës në KiE: Shqipëria përballet me rrezik ekzistencial nga fenomenet e narkoshtetit

Kryetari i Partisë Demokratike, Sali Berisha, gj timpul fjalës së mbajtur në Asamblenë Parlamentare të Këshillit të Europës, ka ngritur shqetësimin e tij lidhur me situatën politike, eksodin masiv të qytetarëve dhe përhapjen e trafikut të lëndëve narkotike në Shqipëri. Në nisje të fjalës së tij, Berisha bëri një vlerësim të lartë për rolin e diasporës shqiptare, duke theksuar se bashkatdhetarët jashtë kufijve kanë dhënë një mbështetje vendimtare për mbijetesën, fitimin e lirive dhe zhvillimin e kulturës kombëtare. Megjithatë, kreu i opozitës u ndal te kriza e thellë e emigracionit, duke e cilësuar atë si një sfidë madhore që rrezikon drejtpërdrejt të ardhmen dhe ekzistencën e vetë kombit shqiptar. Duke vijuar më tej me akuzat e ashpra ndaj ekzekutivit, Berisha e etiketoi Shqipërinë si një “narkoshtet”, duke pretenduar se vendi mban vendin e parë në kontinent për prodhimin e kanabisit dhe se kartelet vendase janë furnizuesit kryesorë të kokainës në tregun evropian. Në fjalën e tij përmbyllëse, ai theksoi se mbajtja e një qëndrimi të prerë nga ana e komunitetit ndërkombëtar ndaj kësaj situate është një domosdoshmëri jetike për shpëtimin e vendit. “Shqipëria përballë një kërcënimi ekzistencial, nevojitet një qëndrim ndërkombëtar ndaj narkoshtetit. Asnjë komb nuk mund dhe nuk duhet të jetë më krenar për diasporën e tij sesa kombi shqiptar. Diasporës i detyrohemi pothuajse mbijetesën tonë, liritë tona, si dhe një kontribut të jashtëzakonshëm në kulturën tonë. Por sot, për fat të keq, më duhet t’ju paraqes një tablo të tmerrshme, një efekt shkatërrues të emigracionit në vendin tim. Justin Gast, në një studim të kryer në 149 vende, ka arritur në përfundimin se emigracioni mund të shkaktojë një “rrjedhje demografike” dhe të ketë pasoja shumë të rënda. Në Shqipëri, kjo e ka vendosur kombin përballë një kërcënimi real ekzistencial. Aktualisht, në hapësirën e Bashkimit Evropian, sipas Eurostat-it, nga çdo 1 mijë shqiptarë, 466 jetojnë në vendet e BE-së. Imagjinoni se në çfarë gjendjeje ndodhemi. Kjo është tërësisht pasojë e narkoshtetit shqiptar, i cili është narkoshteti i vetëm në botë, por fatkeqësisht ende i panjohur dhe i pavlerësuar si i tillë nga Evropa. Shqipëria është eksportuesja e parë e kanabisit, ndërsa kartelet shqiptare të drogës janë transportuesit më të mëdhenj të kokainës në Evropë. Për ta përmbyllur, është jetike një qëndrim ndërkombëtar ndaj këtij narkoshteti, për të shpëtuar kombin,” u shpreh ai.