Bllokimi në Kuvend, PDK këmbëngul: Pa ligjin për Specialen nuk ka pjesëmarrje në seanca

Deputetja e Partisë Demokratike të Kosovës, Blerta Deliu-Kodra, ka bërë të qartë pozicionin e partisë së saj lidhur me zhvillimet aktuale në Kuvendin e Kosovës, duke vendosur kushte të rrepta për mbarëvajtjen e punimeve legjislative. Gjatë një paraqitjeje televizive, ajo theksoi se grupi parlamentar i PDK-së refuzon kategorikisht çdo rend dite tjetër, përderisa në seancë plenare nuk sillet për shqyrtim dhe miratim projektligji për Dhomat e Specializuara. "Asnjë deputet i yni nuk do të jetë në Kuvend pa e diskutuar ligjin që ne e kemi kërkuar, është iniciativë që i përgjigjet nevojës që sot e ka Kosova. Po flasim për një ligj, kemi folur, ka folur zotëri Hamza për financim, për mbështetje të krerëve të UÇK-së në procesin gjyqësor. Kemi pritur që së paku qeveria në raste si kjo nuk e dëshmon vetëm me një deklaratë vullnetin e saj politik, por kur cenohen themelet e shtetit, një qeveri normale do duhej të sillej jo vetëm me seriozitet, të dëshmonte gjithë mbështetjen. Prioriteti kryesor i Kosovës sot është vendimi që e ka atakuar shtetin e Kosovës", u shpreh Deliu-Kodra. Në vijim të fjalës së saj, ligjvënësja e opozitës drejtoi akuza të ashpra në adresë të ekzekutivit dhe ministres së Punëve të Jashtme, Donika Gërvalla. Ajo vlerësoi se zvarritjet proceduriale dhe justifikimet me raporte ekspertësh përbëjnë vetëm një taktikë për të kaluar afatin e përcaktuar të 6 tetorit.