Përplasja rreth Gjykatës Speciale: Vlora Çitaku i kundërpërgjigjet ashpër diplomatit britanik

Sekretarja e Përgjithshme dhe deputetja e Partisë Demokratike të Kosovës, Vlora Çitaku, ka ngritur zërin kundër deklaratave të bëra nga ambasadori i Mbretërisë së Bashkuar në Kosovë, lidhur me vendimin e fundit të Gjykatës Speciale në Hagë ndaj ish-udhëheqësve të Ushtrisë Çlirimtare të Kosovës. Reagimi i Çitakut erdhi pasi diplomati britanik kishte theksuar se dënimet e dhëna kanë natyrë individuale. Ajo ka refuzuar këtë interpretim, duke pohuar se një qasje e tillë nuk përkon aspak me realitetin e dokumentuar në vendimin e gjykatës. Sipas ligjvënëses së PDK-së, problemi kryesor qëndron te fakti se UÇK-ja është trajtuar në aktgjykim si “ndërmarrje e përbashkët kriminale”, element ky që përbën peshën reale dhe shqetësimin kryesor të këtij procesi gjyqësor. Duke përdorur një ton të ashpër kritik, Çitaku ka deklaruar se nuk do të lejojnë që e vërteta të mbulohet. Ajo ka theksuar se pavarësisht divergjencave në opinionet rreth vendimit, ajo kurrë nuk do të pajtohet që epopeja e lavdishme për liri të njolloset përmes një gjuhe që e barazon atë me kriminalitetin. “Nuk kemi me heshtë derisa lufta jonë për liri të përshkruhet me gjuhën e kriminalitetit. Nuk kemi me e pranu që historia jonë të rishkruhet për komoditetin politik të askujt”, ka përfunduar ajo në reagimin e saj publik. Debati është nxitur pas qëndrimit të shprehur nga ambasadori Jonathan Hargreaves, i cili pati deklaruar se vendimet gjyqësore ndaj ish-krerëve të UÇK-së janë të karakterit rreptësisht individual dhe nuk cenojnë në asnjë mënyrë shtetësinë apo sovranitetin e Republikës së Kosovës.