Sport
Ndeshje vendimtare në Dublin, “Dardanët” gati për mbështetjen madhështore të Kosovës
Reklamë e Sponsorizuar
Përfaqësuesja e Kosovës do të ketë mbështetjen e zjarrtë të tifozëve të saj edhe në kryeqytetin irlandez. Grupi i njohur i tifozëve “Dardanët” do të udhëtojë drejt Dublinit për të qenë krah ekipit kombëtar në sfidën e fundit të grupit dhe të këtij viti kalendarik kundër Irlandës.
Përmes një njoftimi zyrtar në rrjetet sociale, “Dardanët” kanë njoftuar se kanë organizuar një pikë takimi për të gjithë bashkëkombësit dhe mbështetësit që do të ndjekin ndeshjen nga afër.
Tifozët janë thirrur që të mblidhen nesër, duke filluar nga ora 14:00, në lokalin “The Quays Bar Dublin - Temple Bar”, para se të marshojnë drejt stadiumit për t'i dhënë kurajë futbollistëve të Kosovës.
Po ashtu, në këtë vend grumbullimi do të bëhet edhe shpërndarja e shallave për të gjithë ata persona që i kanë siguruar biletat e tyre përmes strukturave të grupit të tifozëve.
Ky takim është vlerësuar me peshë jetike nga “Dardanët”, të cilët e kanë përshkruar atë si një finale të vërtetë, duke pasur parasysh ndikimin e madh që rezultati do të ketë në objektivat e ardhshme të përfaqësueses.
“Kjo është finalja e vërtetë, ndeshja përmbyllëse e këtij grupi dhe e këtij viti kalendarik. Rëndësia e saj është jashtëzakonisht e madhe për ambiciet tona, prandaj edhe ne, si tifozë, do të jemi në lartësinë e detyrës, duke dhënë çdo atom të energjisë dhe përkrahjes për djemtë tanë. Së bashku do të dalim fitimtarë!”, thuhet në njoftimin e tyre.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: