Kronikë
Berisha nga GJKKO: Ftesë e hapur për bashkim ndaj të gjithëve për largimin e Ramës
Reklamë e Sponsorizuar
Kryetari i Partisë Demokratike, Sali Berisha, ka dalë në një prononcim për mediat pas paraqitjes së tij në Gjykatën e Posaçme, ku është i detyruar të paraqitet në kuadër të masës së sigurisë.
Gjatë fjalës së tij, ai u ndal te mungesa në protestën e fundit, duke sqaruar se bëhej fjalë për një tubim qytetar dhe prania e tij mund të keqkuptohej si tentativë për ta politizuar atë.
"Kemi të bëjmë me dy kategori protestash: ato popullore, ku demokratët përbëjnë forcën e parë, dhe protestat e mirëfillta partiake. Pjesëmarrja ime do të shërbente për t'i dhënë ngjyrime politike një organizimi që i takon qytetarëve", u shpreh lideri i opozitës.
Në vijim të prononcimit, gazetarët e pyetën nëse një zhvillim i fundit brenda Asamblesë Socialiste nënkupton një ftesë drejtuar figura të caktuara si Erion Veliaj dhe Elisa Spiropalaj për t'iu bashkuar opozitës.
Edhe pse nuk i foli me emra të përveçëm, kreu i PD-së përsëriti thirrjen për bashkimin e çdo faktori politik që e sheh kreun e qeverisë aktuale si pengesën kryesore për vendin.
"Çdo aktor që e vlerëson Ramën si të keqen më të madhe në historinë e pluralizmit shqiptar, duhet të bëhet bashkë që ta largojmë sa më parë", përfundoi Berisha.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: