Detajet financiare zbulohen në Itali: Sa fiton realisht Edon Zhegrova te Juventusi

Paga e yllit të Kombëtares së Kosovës, Edon Zhegrova, është bërë publike nga shtypi sportiv italian, i cili ka nxjerrë në dritë shifrat e plota të kontratës së tij me gjigantin nga Torino. Sipas këtyre raporteve, 27-vjeçari përfitojë afro 3.125 milionë euro në vit, një shifër kjo që përfshin gjithashtu bonuset e vendosura në marrëveshjen e tij me klubin bardhezi. Duke analizuar kontratën e tij katërvjeçare, Zhegrova pritet të fitojë gjithsej rreth 23.26 milionë euro bruto përgjatë kësaj periudhe, duke përfaqësuar një mesatare prej rreth 5.815 milionë euro bruto në baza vjetore. Pas zbritjes së taksave dhe kontributeve tatimore, sulmuesi anësor arkëton rreth 3.1 milionë euro neto në vit, ose afërsisht 258 mijë euro në muaj. Nëse kontrata respektohet deri në fund, fitimet e tij neto gjatë katër viteve do të kapin shifrën prej rreth 12.4 milionë eurosh. Mediat pranë klubit torinez kanë hedhur dritë edhe mbi ecurinë e tij sportive, duke sjellë në vëmendje spekulimet për një largim të mundshëm gjatë merkatos. Pavarësisht zërave, anëtari i Përfaqësueses së Kosovës ka dhënë përgjigjen e duhur në fushën e blertë. Ai realizoi golat e tij të parë zyrtarë me fanellën e Juventusit në triumfin kundër Sassuolos, ndërsa regjistroi edhe një asistim për Bremerin në sfidën ndaj Atalantës. “Kishte zëra për një largim të mundshëm gjatë afatit kalimtar. Ai shënoi golat e parë për Juven në ndeshjen kundër Sassuolos dhe dha një asistim për Bremerin në ndeshjen kundër Atalantës. Këto shifra pozitive janë diçka që ai shpreson t’i vazhdojë, edhe pse Luciano Spalletti e sheh atë kryesisht si zëvendësues gjatë ndeshjes”, shkruhet në raportimin nga Italia. Edon Zhegrova iu bashkua Juventusit në shtator të vitit të kaluar nga radhët e Lille, duke u shndërruar në një nga futbollistët shqiptarë me profilin më të lartë në elitën e futbollit italian.