Ardian Gjini: Kënga nacionaliste serbe në Bruksel është fyerje e rëndë për Kosovën

Kryetari i Aleancës për Ardhmërinë e Kosovës, Ardian Gjini, ka shprehur indinjatën e tij të thellë pas incidentit të shënuar gjatë hapjes së Forumit të Zgjerimit të Bashkimit Evropian, ku u lejua interpretimi i një kënge me nota nacionaliste serbe. Ky gjest, sipas tij, përbën një fyerje të drejtpërdrejtë ndaj shtetit të Kosovës, ndërsa ka kërkuar nga zyrtarët e Brukselit një shpjegim urgjent për këtë lëshim. Në një reagim publik, Gjini e ka drejtuar gishtin edhe nga ekzekutivi kosovar, duke e ndërlidhur këtë ngjarje me atë që ai e cilëson si dështim të plotë të diplomacisë dhe përkeqësim të raporteve me partnerët ndërkombëtarë. “Bashkimi Evropian dëshmoi mungesë serioziteti ndaj Kosovës, por kjo nuk është një rastësi. Kur qeveria jonë shfaq papërgjegjësi dhe nuk e trajton me seriozitet shtetin e vet, është e pritshme që edhe të tjerët të veprojnë njësoj”, ka deklaruar Gjini. Sipas kreut të AAK-së, politika aktuale e qeverisë e ka margjinalizuar Kosovën nga proceset vendimmarrëse, duke krijuar kështu terren të përshtatshëm për provokime të tilla brenda institucioneve të Bashkimit Evropian. “Me një diplomaci të dështuar dhe raporte të dëmtuara me aleatët, qeveria ia ka hapur udhën këtyre provokimeve në zemër të Brukselit”, shtoi ai. Në përmbyllje të reagimit të tij, Gjini ka bërë thirrje për një ndërhyrje të menjëhershme institucionale, duke kërkuar që ky rast të adresohet përmes kanaleve zyrtare diplomatike.