Skandal në zemër të BE-së: Këngë nacionaliste serbe në Bruksel, Zulfaj kërkon llogari nga komisionerja Kos

Një incident i rëndë ka ndodhur gjatë Forumit të Zgjerimit të Bashkimit Evropian në Bruksel, ku interpretimi i një kënge nacionaliste serbe ka shkaktuar reagime të ashpra. Këngë kjo, e cila njihet për mesazhet që mohojnë shtetësinë e Kosovës dhe që e ka zanafillën në periudhën e regjimit të Sllobodan Millosheviqit, është dëgjuar në hapje të këtij aktiviteti zyrtar, duke shkaktuar indinjatë të thellë. Kryenegociatori i Kosovës për anëtarësim në BE, Jeton Zulfaj, e ka cilësuar këtë ngjarje si një skandal të papranueshëm. Përmes një reagimi publik, ai i ka kërkuar sqarime urgjente komisioneres për Zgjerim, Marta Kos, lidhur me rrethanat se si u lejua një manifestim i tillë në një institucion që përfaqëson vlerat evropiane, si dhe cilat masa konkrete do të merren për këtë shkelje. Krahas kësaj, Zulfaj ka ngritur shqetësimin mbi përjashtimin e Kosovës nga ky Forum. Ai theksoi se ky përjashtim është i pakuptimtë kur merret parasysh përparimi demokratik që Kosova ka shënuar gjatë dekadës së fundit, si dhe harmonizimi i plotë i politikës së jashtme të vendit me atë të Bashkimit Evropian. "Jemi të tronditur nga ajo që ndodhi në Bruksel. Një aktivitet i BE-së për zgjerimin nuk mund të shndërrohet në një skenë për promovimin e nacionalizmit serb, veçanërisht kur bëhet fjalë për këngë që lidhen me periudhën e shtypjes së popullit tonë", deklaroi Zulfaj, duke nënvizuar nevojën që institucionet evropiane të tregojnë seriozitet dhe të mbajnë përgjegjësi për këtë situatë.