Trepça triumfon në “Karagaçi”, Peja thellohet në krizë rezultatesh

Kriza e thellë te Peja vazhdon të marrë përmasa shqetësuese, pasi skuadra pejane ka regjistruar humbjen e shtatë radhazi në elitën e basketbollit kosovar. Pavarësisht riformatimit të skuadrës, verdhezinjtë nuk kanë arritur të ndalin serinë negative, duke u mposhtur të dielën mbrëma nga Trepça me rezultat të ngushtë 85:83, në kuadër të derbit të xhiros së nëntë. Ndeshja në palestrën “Karagaçi” nisi me ritëm të lartë, ku vendasit treguan shenja jete duke e fituar çerekun e parë 23:22, ndërsa në pushimin mes pjesëve shkuan me një epërsi minimale prej 47:45. Megjithatë, kampionia në fuqi, Trepça, tregoi mentalitet fitues në çerekun e tretë. Me një dominim të plotë (27:12), mitrovicasit krijuan një avantazh komod prej 13 pikësh (72:59) para fillimit të periudhës së fundit. Ndonëse Trepça dukej se e kishte siguruar fitoren kur udhëhiqte 80:68, rreth katër minuta para fundit, Peja ndërmori një kundërsulm të furishëm. Vendasit arritën të ngushtonin shifrat në 80:76 dhe më pas në vetëm dy pikë diferencë, por mysafirët treguan gjakftohtësi në momentet vendimtare për të marrë pikët e plota. Te Trepça, paraqitje solide pati Shawn Jones me një “double-double” (13 pikë e 11 kërcime), ndërsa Dardan Kapiti kontribuoi me 16 pikë. Nga 13 pikë realizuan edhe Ja’Cori Payne dhe Drew Thelwell. Në krahun tjetër, te Peja spikati Dominic Artis me 26 pikë, tetë kërcime e gjashtë asistime, i ndjekur nga Gray Ricks (16 pikë) dhe Xavier Johnson (12 pikë e 10 kërcime). Vlen të përmendet se në këtë përballje nuk u aktivizua Dardan Berisha, i cili iu bashkua skuadrës gjatë javës. Pas këtij triumfi, Trepça vazhdon marshimin me gjashtë fitore rresht, duke kryesuar tabelën me 16 pikë, ndërsa Peja mbetet në pjesën e poshtme të renditjes me 11 pikë. Interesant është fakti se pikërisht fitorja ndaj Trepçës më 26 shtator mbetet suksesi i fundit i Pejës në parket, ndërsa që nga ajo kohë, skuadra po kalon në një periudhë tejet sfiduese.