Skandal në Bruksel: Kënga nacionaliste serbe “pushton” Forumin e BE-së, mungon përfaqësimi i Kosovës

Një incident i paprecedentë ka ndodhur në kryeqendrën evropiane, në prag të Forumit të Zgjerimit të Bashkimit Evropian (EU Enlargement Forum 2026), ngjarje kjo e organizuar nga Komisioni Evropian nën patronazhin e komisionares për Zgjerim, Marta Kos. Në mbrëmjen hapëse të këtij aktiviteti, është interpretuar kënga nacionaliste serbe “Oj Kosovo, Kosovo”, e cila njihet për narrativën e saj që pretendon territorin e Kosovës. Edicioni i dytë i këtij forumi, i planifikuar për datat 15 dhe 16 nëntor, ka mbledhur në Bruksel nivele të larta politike, përfaqësues të shoqërisë civile, artistë dhe ekspertë nga vendet anëtare dhe ato aspirante. Megjithatë, ajo që ka rënë në sy është mungesa e plotë e përfaqësuesve nga Kosova në këtë ngjarje të rëndësishme, ndërkohë që skena i është lënë hapësirë një interpretimi që bie ndesh me frymën e bashkëpunimit evropian. Sipas programit zyrtar, performanca muzikore e mbrëmjes së 15 nëntorit ishte paraparë të realizohej nga Orkestra e të Rinjve të Ballkanit Perëndimor në bashkëpunim me grupin slloven “Kapobanda”. Pikërisht ky grup ka zgjedhur të interpretojë këngën serbe “Oj Kosovo, Kosovo”, një krijim i vitit 1989 nga Ljubomir Ljuba Manasijeviq. Kjo këngë, e cila shpesh përdoret për të ushqyer diskursin nacionalist, përmban vargje që ndërlidhen me figura historike serbe dhe pretendime territoriale mbi Kosovën. Për më tepër, kënga është bërë simbol i propagandës politike në rajon, veçanërisht pas publikimeve të fundit ku ajo shoqërohet me mesazhe që e cilësojnë Kosovën si “zemrën” e popullit serb, nga e cila ata nuk heqin dorë. Përdorimi i këtij repertori në një aktivitet që synon promovimin e zgjerimit të BE-së dhe stabilitetit rajonal është vlerësuar si një veprim skandaloz dhe i pandjeshëm politikisht. Ndërkohë, dita e dytë e forumit, më 16 nëntor, pritet të shënohet nga fjalimet e figurave kryesore të institucioneve evropiane, përfshirë presidenten e Komisionit Evropian, Ursula von der Leyen, presidentin finlandez, Alexander Stubb, dhe komisionaren Marta Kos. Ky zhvillim ka nxitur reagime dhe pikëpyetje të forta mbi kriteret e përzgjedhjes së repertorit artistik në ngjarje që kanë për qëllim afrimin e vendeve të Ballkanit Perëndimor me vlerat e Bashkimit Evropian.