Drejt një Kosove të gjelbër: Fitore Pacolli zbardh vizionin për qytetet e së ardhmes në COP31

Ministrja e Mjedisit, Fitore Pacolli, ka prezantuar në samitin ndërkombëtar COP31 strategjinë afatgjatë të Kosovës për zhvillimin urban deri në vitin 2050. Në qendër të këtij vizioni qëndron transformimi i mënyrës së planifikimit të qyteteve, forcimi i reziliencës urbane dhe garantimi i një roli aktiv për qytetarët në vendimmarrjen shtetërore. Në fjalën e saj, ministrja Pacolli ka vënë theksin te domosdoshmëria e një ndryshimi rrënjësor në qasjen ndaj urbanizimit. Ajo shprehu kritika ndaj modelit aktual të ndërtimit, duke e cilësuar atë si një qasje që ka shkaktuar mbingarkesë me beton dhe neglizhim të nevojave themelore të banorëve për një mjedis jetësor cilësor. Sipas këtij vizioni, modeli i ri i zhvillimit për vitin 2050 do të mbështetet mbi tri shtylla kryesore: inovacionin e gjelbër, reziliencën urbane dhe fuqizimin e të rinjve. Pacolli argumentoi se Ministria duhet të shërbejë si një mekanizëm që dëgjon zërin e komuniteteve, duke siguruar bazën ligjore dhe mbështetjen financiare që idetë e qytetarëve për lagjet dhe fshatrat e tyre të kthehen në realitet. Një vëmendje e veçantë në këtë prezantim iu kushtua përfshirjes së gjeneratave të reja në hartimin e politikave publike. Përmes platformave të bashkëkrijimit, ministrja synon që fëmijët dhe të rinjtë të ndikojnë drejtpërdrejt në zgjidhjet urbane dhe në nxitjen e ndërmarrësisë ekologjike. “Ky është demokratizimi i vërtetë i hapësirës publike që prezantuam para botës”, deklaroi Pacolli, duke nënvizuar se qëllimi përfundimtar është krijimi i një Kosove ku çdo banor e ndien veten pjesë të pandashme të hapësirës së përbashkët, qoftë në zonat urbane apo ato rurale.