Lamtumirë legjendës: Tetova i jep lamtumirën e fundit Agron Memedit

Nën një atmosferë të rëndë pikëllimi, qyteti i Tetovës ka përcjellë sot për në banesën e fundit Agron Memedin, ish-reprezentuesin e Maqedonisë së Veriut dhe ndihmëstrajnerin e KF Shkëndija. Ndarja e tij e parakohshme nga jeta ka lënë një boshllëk të madh dhe ka tronditur mbarë opinionin sportiv në vend. Ceremonia e varrimit mblodhi një numër të madh njerëzish, ku spikatnin ish-bashkëlojtarë, miq të ngushtë dhe personalitete të futbollit. Në shenjë nderimi, i gjithë ekipi i Shkëndijës ishte i pranishëm, krahas figurave si Agim Ibraimi dhe Ferhan Hasani, të cilët iu bashkuan familjarëve dhe qytetarëve nga mbarë vendi për t'i dhënë lamtumirën e fundit mikut të tyre. Në këtë ceremoni prekëse morën pjesë edhe futbollistët e kombëtares, Elmazi, Meliqi dhe Fetai, të cilët shprehën ngushëllimet për humbjen e madhe. Të pranishmit përcollën me dhimbje të thellë njeriun që dha një kontribut të çmuar për ngritjen e KF Shkëndijës dhe la gjurmë të pashlyeshme në historinë e futbollit maqedonas.