Përparim Rama 'sfidon' krerët e VV-së në një video virale me inteligjencë artificiale

Kryetari i Komunës së Prishtinës, Përparim Rama, ka zgjedhur një mënyrë mjaft të veçantë dhe kreative për të komunikuar me ndjekësit e tij në rrjetet sociale këtë fundjavë. Ai ka publikuar në platformën TikTok një video të krijuar përmes teknologjisë së inteligjencës artificiale, e cila ka marrë vëmendjen e publikut. Në këtë video montazh, i pari i kryeqytetit shfaqet në një skenar imagjinar sportiv, ku shihet duke dribluar figura të larta të Lëvizjes Vetëvendosje. Në mesin e personazheve të "sfiduar" në fushën virtuale janë kryeministri Albin Kurti, koordinatorja e komiteteve në VV, Dejona Mihali, si dhe ministri i Financave, Punës dhe Transfereve, Hekuran Murati. Krahas videos, e cila është shoqëruar me një dozë humori, Rama ka lënë edhe një mesazh të shkurtër për ndjekësit e tij. "Të dieleve, luajmë", ka shkruar ai, duke iu referuar atmosferës relaksuese të ditës së pushimit.