Dyshime për zhvillimin e derbit Peja-Trepça: Mungesa e policisë vë në pikëpyetje ndeshjen

Përballja e shumëpritur ndërmjet Pejës dhe Trepçës, e paraparë për xhiron e nëntë të Superligës së Kosovës në basketboll, rrezikon të mos zhvillohet fare. Shkak për këtë situatë të pasigurt është mungesa e forcave të rendit, prania e të cilave është obligative për mbarëvajtjen e çdo ndeshjeje zyrtare në kampionatin tonë. Ndërkohë që koha për fillimin e takimit po afron, me më pak se 30 minuta të mbetura, situata në palestrën “Karagaç” mbetet e tensionuar. Lojtarët e të dyja skuadrave kanë dalë në parket për nxehmjet e fundit, megjithatë zhvillimi i ndeshjes zyrtare vazhdon të mbetet në pikëpyetje të madhe për shkak të mungesës së masave të sigurisë. Sipas rregulloreve në fuqi, Policia e Kosovës duhet të jetë e pozicionuar në ambientet e palestrës të paktën 90 minuta para fillimit të lojës. Për më tepër, dyert e palestrës vazhdojnë të jenë të mbyllura për tifozët, pasi nuk është marrë ende vendimi për lejimin e hyrjes së tyre. Deri në këto çaste, asnjë pjesëtar i Policisë së Kosovës nuk është parë në ambientet e “Karagaçit”, duke lënë në pezull fatin e këtij dueli të rëndësishëm të elitës së basketbollit kosovar.