Goditje e rëndë për Bitcoin: Pëson rënie drastike dhe përgjysmohet nga kulmi historik

Tregu i monedhave digjitale po përballet me një valë të fuqishme shitjesh, pasi Bitcoin ka regjistruar një tjetër rënie drastike duke prekur nivelin e tij më të ulët pëjatë tre muajve të fundit. Sipas të dhënave të publikuara të dielën, më 15 nëntor, çmimi i Bitcoin ra deri në kuotën e 63,311 dollarëve, duke shënuar kështu pikën më të dobët që prej datës 17 gusht 2026. Aset kryesor digjitak shënoi një zhvlerësim prej 5.7% gjatë seancave tregtare të së shtunës në Shtetet e Bashkuara, një tendencë negative kjo që vijoi pa u ndalur edhe përgjatë orëve të tregtimit në bursat e Azisë. Statistikat e tregut dëshmojnë se prej datës 21 tetor, Bitcoin ka pësuar një tkurrje prej rreth 25%, ndërsa në krahasim me kulmin e tij rekord prej mbi 126,000 dollarësh të arritur në tetor të vitit 2025, vlera aktuale është përgjysmuar me afërsisht 50%. Në mesin e faktorëve kryesorë që kanë nxitur këtë krizë përfshihen parashikimet për norma më të larta të interesit, largimi i kapitaleve nga fondet e bursës (ETF) të orientuara drejt Bitcoin, si dhe klima e përgjithshme e pasigurisë në skenën financiare globale. Një presion shtesë mbi çmimin erdhi edhe nga mbyllja e detyrueshme e llogarive të tregtarëve që kishin përdorur levë financiare apo fonde të huazuara për të pozicionuar kapitalin e tyre në tregun e kriptovalutave. Metrikat e platformës CoinGlass tregojnë se brenda një harku kohor prej 24 orësh janë likuiduar pozicione me një vlerë marramendëse prej rreth 1.9 miliardë dollarësh, ku plot 684 milionë dollarë i përkasin vetëm Bitcoin. Në të njëjtën kohë, periudha nga 30 tetori deri më 13 nëntor ka dëshmuar largimin neto të afro 3 miliardë dollarëve nga fondet amerikane ETF të këtij aseti. Ekspertët e fushës theksojnë se tregu mbetet tejet i ndjeshëm ndaj çdo zhvillimi lidhur me politikat e normave të interesit dhe ndryshimeve të oreksit të investitorëve për risk. Pavarësisht situatës pesimiste, analistët sugjerojnë se pas kësaj vale të thellë korrigjimi, Bitcoin mund të jetë duke u afruar drejt një zone kritike mbështetjeje teknike.