Niset drejt Hagës Isni Kilaj, pritet verdikti për të, Hashim Thaçin dhe të tjerët

Ish-kryetari i Komunës së Malishevës dhe ish-pjesëtari i Ushtrisë Çlirimtare të Kosovës, Isni Kilaj, ka njoftuar se ditën e sotme është nisur drejt Hagës. Udhëtimi i tij vjen vetëm dy ditë para se Dhomat e Specializuara të Kosovës të japin vendimin përfundimtar në procesin gjyqësor që lidhet me veprat penale kundër administrimit të drejtësisë. Në këtë proces gjyqësor, krahas Kilajt, përfshihen si të akuzuar edhe ish-presidenti i vendit, Hashim Thaçi, ish-drejtori i Agjencisë Kosovare të Inteligjencës, Bashkim Smakaj, Fadil Fazliu, si dhe ish-ministri i Drejtësisë, Hajredin Kuçi. Pak para se të nisej, Kilaj ka publikuar disa momente nga atmosfera familjare në rrjetet sociale, duke shprehur besimin se vendimi i datës 17 nëntor, i caktuar për në orën 10:00, do të sjellë drejtësi. "Sot po nisem për në Hagë! Me 17 nëntor e kemi verdiktin nga Dhomat e Specializuara të Kosovës. Pres drejtësi! Sido që të jetë, gjithmonë-përjetësisht do të jem me Çlirimtarët!", ka shkruar ai në profilin e tij. Ky gjykim rrjedh nga aktakuza e konfirmuar më 29 nëntor 2024, përmes së cilës Hashim Thaçi dhe bashkëakuzuarit e tjerë ngarkohen me përgjegjësi për dyshimet rreth tentativave të kundërligjshme për të ndërhyrë te dëshmitarët dhe dëshmitë e tyre gjatë procedurave për krime lufte.