Aksioni antidrogë “Heshtja”: Mes të arrestuarve për kokainë është edhe ish-ministri Astrit Haraqija

Ish-ministri i Kosovës, Astrit Haraqija, figuron mes personave të prangosur në kuadër të operacionit të gjerë policor të koduar “Heshtja”, i cili është ndërmarrë kundër një rrjeti të dyshuar për trafikim të kokainës në zonën e Prishtinës. Lajmin për ndalimin e tij e ka konfirmuar mbrojtësi ligjor, avokati Korab Bokshi, i cili ka njoftuar se tashmë është dorëzuar një ankesë zyrtare kundër masës së ndalimit. “Po, është arrestuar. Kemi bërë ankesë kundër vendimit për ndalim”, ka deklaruar Bokshi, ndërsa ka shtuar se forcat e rendit kanë kryer kontrolle edhe në banesën e klientit të tij. Sipas avokatit, detajet e plota rreth akuzave ende nuk janë plotësisht të qarta, por dyshohet se ngjarja lidhet ngushtë me operacionin “Heshtja”. Megjithatë, ai ka mohuar çdo lidhje të mundshme të Haraqisë me veprimtaritë e paligjshme që po hetohen nga organet e drejtësisë. “Presim përgjigje për ankesën e paraqitur lidhur me vendimin për ndalim”, shtoi ai. Operacioni “Heshtja” u finalizua më 14 nëntor 2026 nga Drejtoria për Hetimin e Trafikimit me Narkotikë, në bashkërdordinim të ngushtë me Agjencinë e Kosovës për Inteligjencë. Gjatë këtij aksioni të suksesshëm, autoritetet arritën të prangosin gjashtë persona të dyshuar, si dhe sekuestruan afërsisht 1.6 kilogramë substancë të dyshuar narkotike të llojit kokainë. Gjithashtu, gjatë bastisjeve u vunë në sekuestro pasuri të ndryshme, përfshirë automjete luksoze, shuma monetare të gatshme dhe orë dore të shtrenjta, vlera e përgjithshme e të cilave kap shifrën rreth 301 mijë euro. Të gjithë të dyshuarit janë mbajtur në paraburgim policor për një afat prej 48 orësh, ndërkohë që njësitet hetimore po vijojnë punën për zbardhjen e plotë të rrethanave të këtij rasti.