Valë grabitjesh në Francë: Drejtësia dënon me burg katër shtetas shqiptarë

Një grup prej katër shtetasish shqiptarë është dënuar me nga tre vjet heqje lirie nga drejtësia franceze, pasi u gjetën përgjegjës për një sërë vjedhjesh dhe tentativash grabitjeje në prona private. Vendimi gjyqësor është marrë më 13 nëntor nga Gjykata e Colmarit, në përfundim të një hetimi të thelluar të ndërmarrë nga strukturat e policisë vendase. Sipas dosjes hetimore, katër të pandehurit kishin shtrirë aktivitetin e tyre kriminal në disa rajone të Francës, duke u futur dhunshëm në banesa për të vjedhur sende me vlerë. Pavarësisht se gjatë procesit gjyqësor ata kanë mohuar vazhdimisht çdo lloj përfshirjeje në këto akte, trupi gjykues ka vendosur dënimin me tre vite burg për secilin prej tyre. Kjo valë krimesh kishte krijuar një klimë frike dhe pasigurie mes banorëve të rajoneve të prekuara. Në zonën e Turckheim, një prej pronave të shënjestruara kishte pësuar dëme materiale në dritare dhe grilat elektrike. Për të depërtuar brenda, autorët kishin përdorur një darë për skarë të gjetur në kopshtin e shtëpisë. Edhe pse kishin shkaktuar kaos duke përmbysur çdo ambient të brendshëm, ata nuk kishin mundur të merrnin ndonjë send me vlerë. Një tjetër rast është konstatuar në Zimmerbach, ku pronarja e një banese u vu në dijeni nga fqinja e saj se dritarja e shtëpisë kishte mbetur e hapur për dy ditë me radhë. “Kanë shkaktuar shumë dëme për shumë pak gjëra”, ka deklaruar një nga banoret e zonave të prekura. Veprimtaria e paligjshme e grupit është dokumentuar gjithashtu në lokalitete të tjera si Labaroche, Munster, Porte-du-Ried, si dhe në Rosières-aux-Salines brenda rajonit Meurthe-et-Moselle. Mes sendeve të grabitura nga banesat figurojnë bizhuteri të ndryshme dhe një konsolë lojërash e tipit PlayStation 5.