Aksioni anti-drogë i Policisë: Arrestohet ish-ministri Astrit Haraqija dhe pesë persona të tjerë

Ish-ministri i Kulturës dhe ish-anëtari i Këshillit të Përgjithshëm të Lidhjes Demokratike të Kosovës, Astrit Haraqija, është vënë në pranga mbrëmjen e së shtunës gjatë një operacioni të gjërë policor. Haraqija është ndaluar bashkë me pesë persona të tjerë në kuadër të një aksioni anti-drogë të zhvilluar nga Policia e Kosovës, i koduar me emrin “Heshtja”. Ai dyshohet se bënte pjesë në një rrjet të organizuar kriminal të përfshirë në trafikimin dhe shpërndarjen e lëndëve narkotike, konkretisht të llojit kokainë, sipas informacioneve të bëra publike nga autoritetet të dielën. Gjatë këtij operacioni, strukturat policore kanë arritur të sekuestrojnë rreth 1.6 kilogramë kokainë, vlera e së cilës në treg llogaritet të jetë afërsisht 111 mijë euro. Në njoftimin zyrtar të policisë theksohet se ky aksion është kurorëzim i një hetimi intensiv disamujor, ku janë përdorur masa të veçanta hetimore. Këto hetime kanë zbuluar funksionimin e një grupi të strukturuar mirë, i cili kishte role të përcaktuara qartë në hierarki, duke filluar nga krerët drejtues e deri te rrjeti i shpërndarësve në terren. Pas përfundimit të operacionit dhe veprimeve të para hetimore, nga gjashtë të ndaluarit, pesë prej tyre janë dërguar në mbajtje, ndërsa njëri është lënë i lirë në procedurë të rregullt.