Keqpërdorimet me barna: SHSKUK pezullon nga detyra katër zyrtarë në QKUK

Shërbimi Spitalor dhe Klinik Universitar i Kosovës (SHSKUK) ka ndërmarrë masa disiplinore, duke suspenduar katër punonjës, pasi gjatë kontrollit janë konstatuar shkelje dhe parregullsi në procesin e administrimit të barnave dhe materialit shpenzues në Qendrën Klinike Universitare të Kosovës (QKUK). Ky vendim u mor nga Komisioni Disiplinor i QKUK-së, pas zbulimit të mangësive në menaxhimin e këtyre burimeve jetike për pacientët, bëhet e ditur përmes një njoftimi zyrtar. “Bordi Drejtues i Shërbimit Spitalor dhe Klinik Universitar të Kosovës (SHSKUK), në mbledhjen e tetë, të udhëhequr nga kryesuesi Dr. Faik Shatri, u njoftua për masat e para disiplinore të ndërmarra pas evidentimit të parregullsive në menaxhimin e barnave dhe materialit shpenzues. Drejtori i Përgjithshëm i SHSKUK-së, Elvir Azizi, njoftoi se Komisioni Disiplinor i QKUK-së ka marrë vendim për suspendimin e katër punonjësve në lidhje me parregullsitë e evidentuara.”, thuhet në njoftim. Gjatë kësaj mbledhjeje, Bordi Drejtues ka kërkuar nga Drejtoria e Përgjithshme që të paraqesë raporte periodike në çdo tubim mbi ecurinë e mëtutjeshme të procedurave disiplinore dhe hapat konkretë që do të ndërmerren. “SHSKUK do të vazhdojë trajtimin e çdo rasti me seriozitet dhe në përputhje me procedurat në fuqi, për të forcuar edhe më tej përgjegjësinë institucionale në menaxhimin e barnave dhe materialit shpenzues.”, thuhet tutje në njoftim.