Sabalenka pranon fyerjet ndaj Svitolinës: Reagova nën ndikimin e emocioneve dhe kërkoj falje

Tenistja bjelloruse Aryna Sabalenka ka thyer heshtjen pas eliminimit të saj nga WTA Finals prej ukrainases Jelina Svitolina, duke pranuar se ka përdorur fjalor fyes dhe duke kërkuar falje publike për ngjarjen. Në një reagim të bërë në rrjetin social Instagram, sportistja është arsyetuar se tensioni nuk kishte të bënte me kundërshtaren në fushë, por me sjelljen e një pjese të publikut. “Komenti im nuk ishte drejtuar kundër Jelinës. Isha e frustruar me një grup të vogël spektatorësh, të cilët i festonin gabimet e mia me zë të lartë dhe në mënyrë agresive. Në atë moment reagova emocionalisht”, ka shkruar ajo. Gjatë duelit të tensionuar, 28-vjeçarja u kap mat duke fyer kundërshtaren në gjuhën ruse. Sipas ekspertëve të leximit të lëvizjeve të buzëve, ajo dyshohet se është drejtuar nga fusha me fjalët: “K*rvë e mallkuar ukrainase”. Duke reflektuar mbi incidentin, Sabalenka shtoi: “Duhej të kisha ditur ta përballoja ndryshe frustrimin. Kërkoj falje të gjithë atyre që mund t'i kem lënduar me këtë”. Nga ana e saj, Jelina Svitolina bëri të ditur se ishte njohur me fyerjet vetëm përmes valës së reagimeve në rrjetet sociale. Ajo theksoi rëndësinë e fair-play-t duke u shprehur: “Shpresoj vetëm që përballjet tona të zhvillohen me respekt. Në disa nga ndeshjet tona të mëparshme ka pasur edhe komente të pakëndshme kundër meje, të lidhura me luftën”. Aktualisht, tenistja ukrainase po vazhdon të gëzojë një mbështetje të fuqishme nga publiku në Kaliforni.