Koha po mbaron: Si t'i shpëtoni rritjes prej 5% të primeve shëndetësore në Zvicër para datës 30 nëntor

Qytetarët në Zvicër kanë edhe më pak se dy javë në dispozicion për të rishikuar dhe ndryshuar paketën e tyre bazë të sigurimit shëndetësor ose modelin e mbulimit për vitin 2027. Sipas Entit Federal për Shëndetësi (BAG), afati i fundit ligjor për të kryer këtë ndryshim është dita e hënë, më 30 nëntor. Ky afat mbërrin në një periudhë kur kostot e sigurimeve shëndetësore po shënojnë sërish një rritje të ndjeshme. Për vitin 2027, prima mesatare mujore në rang vendi do të kuotohet në 412 franga, duke regjistruar një shtesë prej 19.70 frangash ose 5 për qind krahasuar me vitin korrent. Për sa i përket ndarjes sipas grupmoshave, e cila prek drejtpërdrejt xhepin e qytetarëve, të rriturit do të ballafazohen me një rritje të primit mesatar mujor prej 22.80 frangash, duke arritur shifrën e 487.60 frangave. Ndërkohë, të rinjtë në prag të moshës madhore do të paguajnë 338.80 franga në muaj, kurse për fëmijët fatura mujore do të jetë 128.10 franga. Pabarazitë gjeografike mes kantoneve vazhdojnë të mbeten të theksuara. Kantoni i Jurës kryeson për përqindjen më të lartë të shtrenjtimit me 6.6 për qind, ndërsa Glarusi shënon rritjen më të ulët. Nga ana tjetër, Zugu mbetet streha më ekonomike me një mesatare prej 276.20 frangash për të gjitha moshat, ndërsa Ticino mban vendin e parë për primet më të kripura, duke kapur vlerën 519.90 franga. Situata bëhet edhe më e rëndë në Gjenevë, ku banorët e rritur paguajnë çdo muaj mesatarisht mbi 600 franga. Duke shpjeguar shkaqet e këtij fenomeni, BAG thekson se ky shtrenjtim nxitet nga frekuenca më e lartë e ndërhyrjeve mjekësore, zhvillimi i hovshëm i teknologjisë në shëndetësi dhe plakja e vazhdueshme e popullsisë. Për ilustrim, vetëm gjatë vitit 2025, shpenzimet e skemës së detyrueshme të sigurimit u rritën me 5.3 për qind. Pavarësisht se sigurimi bazë ofron paketë të njëjtë shërbimesh te të gjitha kompanitë, diferencat në çmime mbeten marramendëse, madje edhe brenda të njëjtit kanton. Për këtë arsye, një krahasim i kujdesshëm mund t'u kursejë familjeve me disa anëtarë shuma prej qindra frangash në harkun e një viti. Procesi i krahasimit mund të kryhet pa asnjë kosto në platformën zyrtare të Konfederatës, priminfo.ch, ku gjenden të detajuara të gjitha primet e renditura sipas kantonit, grupmoshës, franshizës dhe llojit të modelit. Një alternativë efikase për të ulur faturën mbetet zgjedhja e një modeli tjetër shërbimi, si ai me mjek familjar, telemjekësia apo rrjetet e mjekëve, si dhe përzgjedhja e një franshize më të lartë – kjo e fundit e këshillueshme kryesisht për personat që vizitojnë mjekun rrallë. Kushdo që vendos të ndryshojë siguruesin duhet të jetë i kujdesshëm që njoftimi zyrtar i shkëputjes t'i mbërrijë kompanisë aktuale brenda afateve ligjore. Për të shmangur vonesat, shumë qytetarë preferojnë ta dërgojnë letrën me postë të rekomanduar disa ditë para afatit. Sipas BAG-ut, në kuadër të sigurimit bazë, kompanitë janë të detyruara me ligj të pranojnë çdo aplikant, pa bërë dallim për moshën apo gjendjen shëndetësore. Situata ndryshon rrënjësisht kur bëhet fjalë për sigurimet shtesë, të cilat rregullohen nga kritere dhe afate kontraktuale specifike. Për këto të fundit, siguruesi ka të drejtë të kërkojë dosjen mjekësore të klientit. Për rrjedhojë, sugjerohet fuqimisht që polica ekzistuese shtesë të mos anulohet pa marrë më parë konfirmimin zyrtar të pranimit nga siguruesi i ri. Për çështje specifike që lidhen me policën personale, të siguruarit mund t'i drejtohen drejtpërdrejt kompanisë së tyre, e cila sipas legjislacionit aktual është e detyruar të ofrojë konsulencë dhe informim falas. Ndërkaq, familjet me të ardhura modeste këshillohen të verifikojnë mundësinë e përfitimit të subvencioneve kantonale për zbutjen e peshës së primeve.