RIKTHIM I DHIMBSHËM: Boksieri kroat pëson nokaut brutal në Londër dhe humbet titullin

Marko Martinjak nuk ka pasur rikthimin e ëndërruar në ring, pasi është mposhtur me nokaut në eventin BKB 61 të zhvilluar në kryeqytetin britanik, Londër. Përballë britanikut Matty Askin, boksieri kroat u mposht në raundin e dytë, duke humbur kështu edhe brezin e kampionit në kategorinë bridger (deri në 102 kg) në boksin pa doreza. Për Martinjakun kjo shënoi sfidën e tij të parë zyrtare pas skandalit të ndodhur në fund të muajit maj gjatë një aktiviteti të futbollit amator. Sipas raportimeve të mediave kroate, episodi vendimtar nisi që në fund të fraksionit të parë, kur Askin e rrëzoi për herë të parë Martinjakun përmes një goditjeje të fuqishme me të majtën në stilin uppercut. Gjyqtari i ringut numëroi deri nëntë, duke i dhënë mundësi boksierit nga Kroacia të kthehej në luftë dhe ta mbyllte raundin. Megjithatë, epërsia e anglezit u konkretizua në raundin e dytë, ku një tjetër goditje e majtë e la Martinjakun pa ndjenja në tapet. Gjyqtari ndërpreu menjëherë duelul, duke i dorëzuar fitoren dhe titullin boksierit vendas. Kjo ishte dalja e parë e Martinjakut pas ngjarjes së rëndë të 31 majit në turnemin "Goat League" në Zagreb. Gjatë finales së atij eventi, pas një fjalosjeje, ai qëlloi me kokë futbollistin Tomisllav Mrkonjiq, i cili u rrëzua në tokë, ndërsa më pas e goditi edhe me top në shpinë. Si pasojë e këtij sulmi, Mrkonjiq pësoi thyerje të hundës, lëndim në vetull, hematomë frontale dhe dëmtime të muskujve të qafës. Pas këtij incidenti, Martinjak kaloi një muaj prapa grilave në paraburgim. Gjatë muajit tetor, autoritetet e drejtësisë ngritën zyrtarisht aktakuzë ndaj tij për veprën penale të tentativës për shkaktim të lëndimeve të rënda trupore. Organet e akuzës kanë kërkuar një dënim prej dy vjetësh heqje lirie pa kusht, si dhe detyrimin për t'iu nënshtruar një trajtimi psikosocial. Gjatë seancave të pyetjeve nga hetuesit, Martinjak është mbrojtur duke thënë se nuk kishte për qëllim lëndimin e futbollistit, duke shpjeguar se përplasja erdhi pasi Mrkonjiq i ishte afruar shumë në fytyrë. Ai ka shprehur pendesë publike, duke shtuar se palët më vonë kishin kërkuar falje reciproke.