I arratisur nga funerali i vëllait: Kapet pas 7 muajsh kërkimesh shqiptari i kërkuar për drogë në Australi

Pas shtatë muajsh në arrati, Orijol Rukaj, shtetasi shqiptar i akuzuar për vepra të rënda në fushën e narkotikëve, ka rënë sërish në prangat e policisë australiane. Arrestimi i 47-vjeçarit u finalizua të premten në Bamaga, një zonë pranë gadishullit Cape York në shtetin e Queensland. Ngjarja që bëri bujë në Melburn ndodhi më 25 prill, kur Rukaj, i cili ndodhej prapa hekurave, përfitoi nga një leje e posaçme për të marrë pjesë në ceremoninë mortore të vëllait të tij. Pavarësisht faktit se ishte nën mbikëqyrjen e vazhdueshme të efektivëve të shërbimit korrektues dhe i prangosur, ai arriti të shmangë vëmendjen e autoriteteve dhe të largohej nga vendngjarja. Sipas dëshmive të mbledhura në atë kohë, Rukaj ishte parë duke ndihmuar në transportimin e arkivolit. Duke shfrytëzuar rrëmujën e krijuar nga pjesëmarrja e rreth 300 personave në varrim, ai arriti t'i shpëtojë mbikëqyrjes. Hetuesit dyshonin se arratisja e tij ishte e mirëorganizuar, duke u larguar nga vendi i ngjarjes me një automjet tip Toyota LandCruiser me ngjyrë të zezë. Pas një operacioni të gjatë kërkimi, policia arriti ta lokalizonte dhe ta ndalonte 47-vjeçarin në veri të Queensland. Aktualisht, Rukaj ndodhet në paraburgim, ku po pret përballjen me drejtësinë për akuzat e rënda që rëndojnë mbi të, si dhe për arratisjen e bujshme.