Valë protestash në Francë: Mbi 200 të prangosur dhe dhjetëra efektivë të lënduar

Një ditë protestash të tensionuara në Francë ka rezultuar me arrestimin e të paktën 219 personave në mbarë vendin, ndërkohë që 10 efektivë të policisë kanë pësuar lëndime të lehta gjatë përballjeve me demonstruesit. Të dhënat zyrtare janë bërë publike nga Ministria e Brendshme franceze. Ndonëse autoritetet vlerësojnë se situata e sigurisë në nivel kombëtar mbetet nën kontroll, incidente të shkëputura janë shënuar në një sërë qytetesh të mëdha, si Marsejë, Lion, Tuluzë, Bordó, Grenobl, Montpellier, Poitiers, Tours, Saint-Étienne, Angers, Nancy, Lilë dhe Rouen. Raporti i ministrisë përkatëse evidenton përdorimin e bombave të mortajave drejt forcave të rendit, si dhe dëme materiale në infrastrukturën publike, bizneset lokale dhe djegien e koshave të mbeturinave. Sipas autoriteteve, pas këtyre akteve të dhunshme qëndrojnë grupe të radikalizuara dhe aktivistë të ekstremit të majtë, të cilët kanë synuar qëllimisht përshkallëzimin e situatës. Në reagimin e saj, Ministria e Brendshme ka konfirmuar ndërhyrjen e vazhdueshme të njësive policore për të mbajtur situatën nën kontroll dhe për të shmangur përshkallëzimin e mëtejshëm. Gjithashtu, autoritetet kanë shprehur shqetësimin e thellë për sulmet e dhunshme të raportuara ndaj përfaqësuesve të mediave gjatë zhvillimeve në qytetin e Lionit.