Misteri i vendimit të PS: Si u përjashtuan Spiropali dhe Ndreca pa votim dhe pa mbështetje statutore?

Ngjarjet e fundit në Asamblenë Kombëtare të Partisë Socialiste kanë ngritur dilema të forta jo thjesht në rrafshin politik, por mbi të gjitha në atë statutor. Gjatë mbledhjes, kryetari Edi Rama kërkoi largimin e Elisa Spiropalit dhe Plarent Ndrecës. Megjithatë, kjo kërkesë nuk kaloi kurrë në fazën e votimit. Pavarësisht debateve dhe kundërshtimeve të shfaqura gjatë diskutimeve, vetë Asambleja nuk u shpreh përmes votës për këtë çështje. Kjo situatë ngre pikëpyetjen e parë thelbësore: Si mund të konsiderohet i vlefshëm një vendim përjashtimi, kur organi kompetent nuk është shprehur përmes votimit zyrtar? Anomalia e kësaj procedure thellohet edhe më tej nga zhvillimet pasuese. Fillimisht, Sekretari i Përgjithshëm i PS-së, Blendi Klosi, deklaroi pas mbledhjes se Elisa Spiropali vijonte të ishte anëtare e partisë, duke lënë të kuptohej se asnjë masë ndëshkimore nuk ishte marrë. Mirëpo, pak më vonë, përmes një reagimi në rrjetet sociale, ai ndryshoi qëndrim duke sqaruar se Spiropali dhe Ndreca janë hequr vetëm nga forumet drejtuese, por ruajnë anëtarësimin në parti. Ky sqarim zyrtar sjell në vëmendje dy paqartësi të tjera kritike. Së pari, Plarent Ndreca rezulton të mos jetë pjesë e asnjë strukture apo forumi drejtues brenda Partisë Socialiste. Lind pyetja logjike: Si është e mundur të përjashtosh dikë nga një organ ku ai nuk ka qenë kurrë anëtar? Nga ana tjetër, rasti i Elisa Spiropalit paraqitet edhe më i ndërlikuar. Sipas përcaktimeve statutore të PS-së, deputetët socialistë fitojnë statusin e anëtarit "ex officio" në Asamblenë Kombëtare, çka do të thotë se e drejta e saj për të qenë pjesë e këtij organi buron direkt nga rregullorja e brendshme e partisë. Në këto kushte, si mund t'i hiqet një e drejtë që i garantohet shprehimisht nga statuti? Krijohet kështu një skenar tejet i pazakontë: lideri i partisë kërkon një masë ndëshkimore, Asambleja nuk voton, në sallë ka kundërshtime, dhe në fund Sekretari i Përgjithshëm njofton një përjashtim nga forumet përmes një sqarimi publik. Nëse rregullat e statutit nuk respektohen më për të përcaktuar kufijtë e vendimmarrjes dhe nëse Asambleja nuk e shef më të nevojshme të votojë kërkesat e kryetarit, atëherë cili mbetet funksioni i saj real? Dhe mbi të gjitha, çfarë peshe dhe vlere ka mbetur për vetë statutin e Partisë Socialiste?