Stërvitje e gjerë në Kampin Vrella, KFOR-i paralajmëron shtim të lëvizjeve të forcave dhe mjeteve të blinduara

Misioni i KFOR-it në vend do të mbajë manovrën ushtarake të koduar “Golden Sabre” brenda hapësirës së Kampit Vrella në ditët në vijim, si pjesë e agjendës së tij të rregullta të përgatitjes dhe stërvitjes. Në këtë operacion stërvitor do të përfshihen gjithashtu Policia e Kosovës, Misioni i Bashkimit Evropian për Sundimin e Ligjit (EULEX) si dhe Forca e Sigurisë së Kosovës (FSK), të cilat do të angazhohen në përputhje me mandatet dhe kompetencat e tyre të sigurisë. Përmes një njoftimi zyrtar, KFOR-i ka bërë të ditur se përgjatë zhvillimit të këtyre aktiviteteve, banorët e zonës përreth mund të konstatojnë lëvizje më të shpeshta të trupave dhe një numër të lartë të mjeteve ushtarake në terren. Sipas njoftimit për media, ky ushtrim ka për qëllim kryesor ngritjen e niveleve të koordinimit, bashkëpunimit dhe bashkëveprimit ndërmjet trupave dhe agjencive pjesëmarrëse, si dhe përmirësimin e gatishmërisë operacionale për të vepruar në mënyrë të bashkërenduar dhe efikase.