Humbje e rëndë për ekranin amerikan: Ndahet nga jeta në moshën 62-vjeçare aktori i njohur Anthony Clark

Bota e televizionit dhe e komedisë amerikane është tronditur nga një lajm i hidhur, pas konfirmimit të vdekjes së aktorit dhe humoristit të njohur, Anthony Clark, në moshën 62-vjeçare. Ikja e tij e parakohshme lënë pas një trashëgimi të pasur artistike në fushën e ekranit dhe humorit. Kjo humbje u bë e ditur më 11 nëntor nga kolegu dhe miku i tij i ngushtë, aktori Mike O’Malley, me të cilin Clark ka ndarë skenën në serialin e famshëm “Yes, Dear”. O’Malley zgjodhi platformat sociale për t'i dhënë lamtumirën e fundit mikut të tij përmes një dedikimi tejet emocional. Në rrëfimin e tij, O’Malley solli në vëmendje fillesat e miqësisë së tyre që datojnë që nga vitet ’90, periudhë kjo shumë kohë para se të bashkëpunonin profesionalisht. Ai e cilësoi Clarkun si një artist me një dhunti të rrallë humori, i cili zotëronte aftësinë unike për t'i shndërruar situatat e zakonshme në momente gazmore. Një prej çasteve më prekëse që ndau ishte biseda e tyre e fundit telefonike, e zhvilluar rreth tri javë para se Anthony të ndërronte jetë. Sipas tij, pavarësisht rrethanave, Clark nuk kishte humbur shpirtin e tij gazmor, duke e bërë sërish të qeshte pa e ditur se ai do të ishte kontakt i tyre i fundit. Karriera artistike e Anthony Clark mori jetë përmes shfaqjeve të stand-up komedisë, ku fillimisht fitoj famë dhe vëmendje në skenën e qytetit të Bostonit. Më pas, ai hodhi hapa të rëndësishëm duke luajtur në serialin “Boston Common”, ndërsa majat e popullaritetit i preku përmes portretizimit të personazhit Greg Warner në produksionin “Yes, Dear”. Në këtë serial televiziv, aktori ishte pjesë e pandashme e kastit për plot gjashtë sezone, duke u transmetuar nga viti 2000 deri në vitin 2006. Po ashtu, gjatë vitit 2006, ai mori përsipër moderimin e sezonit të katërt të spektaklit të njohur “Last Comic Standing”. Pas përhapjes së lajmit për ndarjen e tij nga jeta, figura të shquara të humorit dhe kinematografisë, përfshirë Nick Swardson, menaxherin Barry Katz dhe krijuesin e “Yes, Dear”, Greg Garcia, kanë shprehur ngushëllimet e tyre përmes homazheve publike. Ndërkaq, sipas burimeve pranë industrisë kinematografike, shkaku i dyshuar i vdekjes së aktorit lidhet me komplikacione shëndetësore të shkaktuara nga pneumonia. Megjithatë, deri në këto momente, familja e tij nuk ka lëshuar ende një njoftim zyrtar për të konfirmuar shkakun e saktë të ndarjes nga jeta.