Skandali financiar te City, Haaland: Pyetje e vështirë, jam shumë i lumtur këtu

Erling Haaland është vënë në qendër të vëmendjes për situatën financiare të Manchester Cityt, pasi klubi anglez u shpall fajtor për 114 shkelje të rregullave të Ligës Premier. Sulmuesi shtatlartë norvegjez, i cili aktualisht ndodhet i grumbulluar me Kombëtaren e Norvegjisë, është përballur me pyetje rreth këtij rasti të bujshëm, por ka prauar hapur se nuk posedon shumë informacione mbi këtë temë. “Është një pyetje e vështirë për t'iu përgjigjur, kur nuk di shumë për këtë çështje”, ka deklaruar Haaland gjatë paraqitjes para medieve. Lojtari ka shtuar se mbetet me shpresë se sqarimet e plota do të jepen së shpejti, pavarësisht se nuk ka një afat të saktë kohor se kur mund të ndodhë një gjë e tillë. “Supozoj se përgjigjet do të vijnë në ditët në vijim... Nuk e di kur do të dalin përgjigjet. Nuk kam lexuar shumë për këtë çështje”, u shpreh sulmuesi norvegjez. Pavarësisht situatës delikate, Haaland ka theksuar se ndihet jashtëzakonisht i lumtur te skuadra e Manchester Cityt, duke shuar kështu çdo aludim të mundshëm rreth të ardhmes së tij në klub. “Unë jam lojtar i Cityt dhe jam jashtëzakonisht i lumtur për këtë”, përfundoi ai. Në ndërkohë, Manchester City ka ushtruar të drejtën e apelimit ndaj vendimit të komisionit të pavarur, teksa seanca dëgjimore është parashikuar të zhvillohet para mbylljes së këtij viti. Në rast se vendimi aktual merr formë të prerë, klubi pritet të njohë masën e dënimit para përfundimit të këtij sezoni.