Komuniteti shqiptar në Bazel konfirmon peshën e tij: Mbi 11 mijë banorë flasin gjuhën shqipe

Komuniteti shqiptar në Zvicër vazhdon të dëshmojë një prani gjithnjë e më të fuqishme, ku vetëm në rajonin e Bazelit mbi 11 mijë persona e përdorin shqipen si gjuhë të tyre parësore. Përveç këtij ndikimi demografik, ky komunitet po luan një rol kyç edhe në tregun e punës dhe zhvillimin e ekonomisë lokale përmes nismave të ndryshme sipërmarrëse. Bazuar në statistikat e vitit 2024, saktësisht 11,539 rezidentë të moshës 15 vjeç e sipër në kantonet Basel-Stadt dhe Basel-Landschaft kanë deklaruar shqipen si gjuhën e tyre kryesore. Ndërkaq, statistikat e fundvitit 2025 tregojnë se në këto dy kantone janë regjistruar zyrtarisht 10,257 qytetarë me origjinë nga Kosova, Shqipëria dhe Maqedonia e Veriut. Vlen të theksohet se këto shifra nuk pasqyrojnë numrin total të shqiptarëve që jetojnë në këtë zonë, duke qenë se organet statistikore zvicerane regjistrojnë përkatësinë shtetërore dhe gjuhësore, dhe jo atë etnike. Përtej jetës sociale, bashkësia shqiptare është e integruar thellë në shtyllat kryesore të ekonomisë, duke dhënë kontribut të çmuar në sektorë si ndërtimi, transporti, industria, gastronomia, tregtia dhe shëndetësia. Një tregues i qartë i këtij dinamizmi është edhe zgjerimi i sipërmarrjeve shqiptare në këtë pjesë të helvetikut. Sipas të dhënave nga mediumi zviceran “Bajour”, në rajonin e Bazelit llogariten rreth 300 biznese të themeluara nga sipërmarrës me rrënjë shqiptare. Ky sukses i biznesit është konfirmuar edhe nga Hirmet Ziberi, i cili në vitin 2026 ndërmori hapin e themelimit të shoqatës “Albanische Unternehmen beider Basel”, me misionin e qartë për të bashkuar dhe mbrojtur interesat e kompanive shqiptare në këtë rajon. Prania e shqiptarëve shtrihet gjerësisht si në qendër të qytetit të Bazelit, ashtu edhe në komunat përreth. Brezat e rinj të këtij komuniteti po hedhin hape të sigurt drejt së ardhmes, përmes arsimimit cilësor, punësimit të maturuar dhe integrimit të plotë në shoqërinë zvicerane. Të gjitha këto tregues dëshmojnë se komuniteti shqiptar nuk përbën thjesht një pjesë të rëndësishme të fuqisë punëtore, por është shndërruar në një faktor kyç dhe kontribuues të pazëvendësueshëm në përparimin ekonomik dhe shoqëror të Zvicrës.