Pasiguria nga qentë endacakë sfidon turizmin në Prizren: Strehimorja e re premton zgjidhje deri në vitin 2027

Edhe pse qyteti i Prizrenit vazhdon të mbetet një nga destinacionet më atraktive për vizitorët falë trashëgimisë së pasur historike, pamjeve piktoreske dhe mikpritjes tradicionale, prania e madhe e qenve pa pronar po shndërrohet në një problematikë serioze. Shqetësimi po preket si nga turistët e huaj e rajonalë, ashtu edhe nga komuniteti lokal. Për të adresuar këtë sfidë, komuna ka nisur ndërtimin e një qendre speciale trajtimi me kapacitet për strehimin e rreth 250 kafshëve, e cila pritet të përmbyllë punimet në fillim të vitit 2027. Bërthama historike e Prizrenit vazhdon të mirëpresë numrin më të madh të turistëve, të cilët magjepsen pas bukurisë dhe atmosferës që ofron ky qytet. Megjithatë, prania e kopeve të qenve në rrugë mbetet një pengesë e dukshme për zhvillimin e turizmit. Flamur Jahupaj, një pushues nga Shqipëria, shpreh vlerësimin e tij për qytetin, por nuk e fsheh shqetësimin për këtë dukuri: “Është qyteti më i bukur për mendimin tim, njerëzit i ka të mrekullueshëm, lokalet buzë lumit janë shumë të mira, kanë ushqime cilësore. Sa ju shqetësojnë ju si turistë qentë endacakë? Ah, lëre mos e pyet, ajo është problem edhe në Shqipëri, me kope i kemi në Durrës ne”. Po ashtu, edhe banorët rezidentë të Prizrenit po ndihen çdo ditë e më të rrezikuar nga numri i lartë i kafshëve rrugore, veçanërisht për sigurinë e fëmijëve. “Vërtet është shqetësim i madh për krejt qytetin, jo vetëm për turistë, por veçanërisht për fëmijët, mirëpo se si ta parandalojmë këtë nuk kisha ditë me ju thënë. E di që herë pas here kanë marrë ndonjë aksion për t’i hequr e për t’i dërguar në strehimore të ndryshme, por prapë shohim që veçanërisht kohëve të fundit ka shumë qen”, thekson qytetari Hilmi Bytyqi. Nga ana tjetër, banori Beqir Buzhala vë në dukje edhe gjendjen e rëndë shëndetësore të vetë kafshëve që enden rrugëve: “Ka qen që edhe nuk janë të mirëmbajtur, që të lënë përshtypje edhe me i pa, janë shumë të lodhur e nuk kanë edhe ushqim të mjaftueshëm, me pas mundësi me i dërgu në një strehimore ishte shumë më mirë”. Punimet për ndërtimin e kësaj hapësirë strehuese kanë nisur që në vitin 2025 me synimin për të krijuar një ambient me standarde të larta për trajtimin e tyre. Drejtori i Bujqësisë në Komunën e Prizrenit, Nderim Kadrijaj, ka sqaruar detajet e këtij projekti: “Është një strehimore moderne, ku përveç trajtimit të qenve aty do të ndodhë edhe shërimi i plagëve apo operime të ndryshme ndaj kafshëve që ju ndodhin fatkeqësi, është me kapacitete të mëdha, diku tek 250 qen ka hapësirë”. Objekti i ri i strehimit të përkohshëm pritet të jetë plotësisht gati në fillim të vitit 2027, duke u parë si zgjidhja kryesore për të kthyer sigurinë në rrugët e qytetit.