Mbappé i shpëton bisturisë, Mourinho në dilemë për skemat e Real Madridit

Kylian Mbappé ka nisur fazën e rikuperimit për gjurin e tij të majtë, duke zhvilluar seanca stërvitore në Valdebebas pas një dite të vetme stabilizimi, një ritëm që do të vijojë edhe gjatë ditës së sotme. Sulmuesi francez i Real Madridit ka shmangur një ndërhyrje të mundshme kirurgjikale, pasi shqetësimet fizike të shfaqura gjatë angazhimit të tij me kombëtaren e Francës dolën të ishin më pak alarmante sesa mendohej në fillim. Sipas informacioneve të publikuara, bëhet fjalë për një hiperzgjatje të kapsulës së pasme të gjurit të majtë, e cila kërkon një kohë shërimi prej 10 deri në 12 ditë. Megjithatë, dëmi mund të kishte qenë tejet i rëndë. Lojtari francez ndjeu dhimbje menjëherë pasi realizoi gol në sfidën ndërmjet Turqisë dhe Francës të premten e kaluar, vendim kyç për të ndalur menjëherë lojën. Analizat mjekësore vërtetuan se vazhdimi i lojës do ta kishte ekspozuar atë ndaj një dëmtimi katastrofik, i cili do t'i rrezikonte seriozisht gjithë ecurinë e sezonit aktual. Edhe brenda radhëve të Real Madridit kishte pasur frikë për një operacion të mundshëm, pavarësisht kontakteve të vazhdueshme me mjekët e Federatës Franceze, derisa u konfirmua përfundimisht se bisturia nuk do të jetë e nevojshme. Duke u bazuar në afatet kohore të rikuperimit, Mbappé mund të rikthehet në fushë më 10 tetor për takimin e La Ligës kundër Villarrealit në stadiumin “Santiago Bernabéu”. Ndonëse ky është skenari i mundshëm, trajneri José Mourinho nuk ka ndërmend të nxitohet apo të rrezikojë me një rikthim të parakohshëm të yllit të skuadrës. Nëse përfshihet në skuadër kundër Villarrealit, kjo do të ndodhë në kufijtë e fundit të fazës së shërimit. Më pas, madrilenët presin dy angazhime tejet sfiduese: transfertën në Romë më 14 tetor dhe superduelin “El Clásico” kundër Barcelonës në “Camp Nou” më 25 tetor. Për këtë arsye, stafi teknik po e analizon me maturi maksimale momentin e rikthimit të tij, me synimin e vetëm që sulmuesi të kthehet në 100 për qind të formës fizike. Në rast se Mourinho zgjedh ta ruajë francezin, ai ka në dispozicion disa alternativa për të rikonfiguruar repartin e sulmit. Opsioni më i drejtpërdrejtë konsiston në ruajtjen e strukturës ekzistuese, duke i besuar vendin e Mbappés te Carlos Espí. Megjithatë, kreu i stolin portugez e vlerëson sulmuesin e Kombëtares U21 më shumë si një armë alternative për të ndryshuar dinamikën e lojës nga stoli nëse gjërat nuk ecin sipas parashikimeve. Një tjetër mundësi taktike është përfshirja e Jude Bellingham në rolin e sulmuesit të rremë, një pozicion që anglezi e kishte ushtruar me sukses edhe në fazën e tij të parë nën drejtimin e Carlo Ancelottit. Ky skenar do t'i hapte rrugë Arda Gülerit të pozicionohej menjëherë pas tij, duke i dhënë mundësi futbollistit turk të startojë në të njëjtin formacion me Diomanden, i cili do të mbulonte krahun e djathtë të fushës. Mourinho ruan në rezervë edhe opsione të tjera nëse vendos të eksperimentojë me skema të reja, ndonëse një lëvizje e tillë mbetet pak e ngjarë. Në fund të fundit, e gjithë situata mbetet e lidhur ngushtë me ecurinë e shëndetit të Mbappés. Klubi i Real Madridit dëshiron të shmangë me çdo kusht përsëritjen e situatës së sezonit të kaluar, kur lojari luajti i dëmtuar derisa u detyrua të ndalej dhe t'i besonte trajtimin specialistit të njohur Bertrand Sonnery-Cottet për të rimëkëmbur plotësisht gjurin e tij.